Napparsimasunut nalunaarsuiviit nunatsinni inerisarniarpaat
Peqqissutsimut naalakkersuisup, taassumalu naalakkersuisoqarfiani pisortap, Peqqinnisaqarfimmilu qaffasissumik suliallit marluk Nunani Avannarlerni Killerni peqqinnissaqarfimmi unammilligassat periarfissallu pillugit Island-imi ataatsimeersuarnissuarnissami peqataanissaanni tassa pissarsiassaq pingaarneq. Naalakkersuisoq Agathe Fontain taama oqarpoq.
- Napparsimasut allattorsimaffiisa qarasaasiatigut takuneqarsinnaalernissaat angorusuttorujussuuarput, tamanna pillugu Savalimmiunik suleqateqarneq neriuppunga ataatsimeersuarnermi siuariarumaartoq, Agathe Fontain taama oqarpoq.
Ataatsimeersuarnermi, januaarip ulluisa 15-aniit 17-iat ilanngullugu ingerlanneqartussami inuillu 40-it missaasa peqataaffigisassaanni, Kalaallit Nunaanni, Island-imi Savalimmiunilu peqqinnissaqarfiit pillugit suleqatigiinneq killiffissiorneqassaaq.
Tassalu napparsimasut pillugit allattuiffiit Savalimmiuni pitsaasumik aaqqissuuneqartarnerat Nunatsinni iluaqutiginiarneqassaaq.
- Napparsimasut allattorsimaffii, patientjournal-it, napparsimasut qanoq inneranik allattorsimmaffii maannakut fax-ikkut nassiunneqartarmata pisarissersornarpoq Agathe Fontain oqarpoq.
- Napparsimasut allattorsimaffii qarasaasiatigut suliarineqartalerpata napparsimasut qanoq innerat sumullu killinnerat nakorsanit sukkanerusumik qularnaannerusumillu takuneqarsinnaalissapput, Peqqissutsimut Naalakkersuisoq Agathe Fontain oqarpoq.
Nunallu Avannarlit Killiit, tassa Nunarput, Island Savalimiullu inukitsuupput tamarmillu siammarsimasunik inoqarlutik. Taamaammat nunat taakkua tamarmik immikkut piginnaasaqarfimminnik sanilerisaminnut agguaqatiginissaat periarfisaalluarpoq, Agathe Fontain oqarpoq.
- Nunat avannaarliit killiit taakkuupput suleqatigilluartariaqakkagut, ajornartorsiutigut assigiittarput, avinngarusimasumi najugaqarnitsinnut tunngasunik aamma timmisartut atorlugit napparsimasunik angallassisarnerit pillugit ataatsimeersuarnermi eqqartuissaagut, Peqqissutsimut Naalakkersuisoq Agathe Fontain oqarpoq.
Nunat avannarliit killiit peqqinnissaqarfii pillugit ataatsimeersuarneq Island-imi Isafjordur-imi januarip 15-anit 17-ata tungaanut pissaaq.
