Nappaatinik kingumut tuniluuttoqalernissaanut piaartumik akiuussutissaqalertarnissaa nunat pissaanillit qulakkeerusuppaat

Nunarsuatsinni kingumut nappaammik tuniluuttuqalissappat, siunissami ullut 100-t ingerlanerinnaanni akiuussutissanik pilersitsisoqartassaaq. G20 taamatut isumaqarpoq.
Nappaatinik tuniluuttoqalissagaluarpat ullut 100-it ingerlaneranni akiuussutissanik nutaanik ineriartortitsisoqarsinnaasariaqartoq, nunarsuarmi naalagaaffiit aningaasarsiornikkut suliffissuaqarnikkullu pissaaneqarnerit aqutsisuisa kissaatigaat. Assi © : Tiziana Fabi/Ritzau Scanpix
Allattoq Ritzau
oktobarip 29-at 2021 13:29
Nutserisoq Ulf Fleischer

Nappaatinik tuniluuttoqalissagaluarpat ullut 100-t ingerlaneranni akiuussutissanik nutaanik ineriartortitsisoqarsinnaasariaqartoq, nunarsuarmi naalagaaffiit aningaasarsiornikkut suliffissuaqarnikkullu pissaaneqarnerit aqutsisuisa kissaatigaat.

Tamanna takuneqarsinnaavoq, nunarsuarmi nunat aningaasarsiornikkut siutui nunat G-20-mut ilaasortat ataatsimoorlutik oqaaseqaataanni.

Akiuussutissat sivikinnerusumik ineriartortinneqarsinnaanerannut tassalu ullunit 300-nit ullunut 100-nut sivikillinneqarsinnaanerannut ilisimatuut ineriartortitsillutillu qulakkerinniarnerannut tapersersuiniarpugut, nunat G20-mut ilaasortat missingiutaat taama allassimasoq, nutaarsiassaqartitsiviup Reutersip takusimavaa.

Akiuussutissat nalinginnaasumik ukiuni qulikkaani ineriartortinneqartarput.

Coronamik tuniluunnermut atatillugu, akiuussutissat ineriartortinneqarnerat misilittarneqarnerat akuersissutigineqarnerallu ukioq ataaseq inorlugu iluatsinneqarput.

Siunissamilu sukkanerusariaqarput nunat G-20-mi ilaasortat taama isumaqarput.

Naalagaaffiit aningaasarsiornikkut suliffissuaqarnikkullu siuarsimanerit 19-it Italiap illoqarfiisa pingaarnissaannik Ruumami sapaatit akunnerata naanerani ataatsimeersuassapput.