Kinap præsidentia ukiuni tallimani Europamiinngeereerluni tikeraartussanngortoq
![](/sites/default/files/styles/image_934x467/public/2024-04/20240301-040920-3-1920x1280we.jpg?itok=55D1ttHQ)
Kinap præsidentia, Xi Jinping, Frankrigimut, Serbiamut Ungarnimullu maajip ulluisa tallimaannit qulingata tungaanut tikeraassaaq.
Kinap nunanut allanut tunngasunut ministereqarfia taama ilisimatitsisoq, nutaarsiassaqartitsivik Reuters allappoq.
Kinap præsidentia Europamut ukiut tallimat missaanni tikeraarsimanani maanna tikeraartussanngorpoq.
Kinap præsidentia Europamut kingullermik 2019-imi tikeraarpoq, tassa coronavirusip tuniluutilinnginnerani Ukrainemilu sorsuttoqalinnginneranili tikeraarluni.
Xi Jinping Frankrigimut, Italiamut Monacomullu taamanikkut tikeraarpoq.
Frankrigip præsidentia, Emmanuel Macron, Kinamut siorna tikeraareersorlu Xi Jinpingip Frankrigimut tikeraangajalernera pillugu nutaarsiassaqartitsiviit qaammatini kingullerni arlaleriarlutik allaaserisarpaat.
Xi Jinpingillu Frankrigimut maajip ulluisa arfernanni arfineq-aappaannilu tikeraarnissaa maanna uppernarsarneqarpoq.
- Naalagaaffiit marluk taakku atorfilittatigut suleqatigiinnerisa ukiunik 60-inngortorsiornerannut atatillugu Kinamit tikeraartoqassaaq, Kinami præsidentip allattoqarfia taama nalunaaruteqartoq nutaarsiassaqartitsivik AFP allappoq.
Xi Jinping Frankrigip illoqarfiisa pingaarnersaannut Parisimut Frankrigillu kimmut kujasissuani nunap immikkoortortaanut Hautes-Pyrénées-mut angalassaaq.
Ukrainemi sorsunnerup eqqartugassat pingaarnerit ilaanniinnissaa ilimagineqartoq, AFP allappoq.
Kinap præsidentia Serbiap præsidentianik Aleksandar Vucicimik aamma ataasimeeqateqassaaq, soorlu aamma Ungarnip ministeriunera Viktor Orbán ataatsimeeqatigineqassasoq.