Kinap Ukrainemi eqqisseqatigiiittoqarnissaanut ikiuukkusunneranut Putinip nersualaaraa
Ukrainemik aaqqiagiinngissuteqartoqarneranut kinguneqarluartussamik Kinap suleqataarusussuseqarnera, Ruslandip præsidentiata Vladimir Putinip nersualaarpaa.
Kinap Ruslandillu akornanni pissutsit aatsaat taama pitsaatigilersimasut, Putin isumaqarpoq.
Kinap præsidentia, Xi Jinping, ullumi ataasinngornermiit Ruslandimissaaq.
Putinilu Kina pillugu ippassaq sapaammi taama oqarluni.
Ukrainemi pisut pillugit arlaannaannulluunniit attuumassuteqanngitsumik Kinap inissisimanera Putinip qujamasuutigaa.
Ruslandip nunani tamalaani Kina pingaarnertut attaveqarfigaa. Pingaartumik Ukrainemi ukiup kingulliup ingerlanerani pisut eqqaassaganni, Ruslandimi Europamit nunaniillu killernit allanit mattunneqarpoq.
Kina eqqisseqatigiittoqarnissaanut suliniuteqartutut inissikkusuppoq.
Xi Jinpingip Ruslandimut ulluni pingasuni tikeraarnerata eqqisseqatigiittoqarnissaanut aqqutissiuisutut Kinami naalakkersuisut oqaatigaat.
Ruslandip Ukrainellu eqqisseqatigiinnissaanut isumaqatigiinnialernissaat Kinap kaammattuutigisimavaa.
Kinalli Ruslandip Ukrainemik saassussineranik assuarinninniannginnera nunat killiit naalakkersuinikkut siuttuisa isornartorsiorsimavaat.
