Nanortalimmi naajarpassuit toqorarpaat

Naajarpassuarnik ajornartorsiuteqarnerup qaangerniarnerani Kommune Kujallermiut isumassarsilluarput. Naajat kaattuartuunerat atorlugu naggammik nerlerneqartarput. Naajat pullatinut pulasut kommunimi sulisunit toqunneqartarput.

- Pullatit siulliit ullaaq nalunaaqutaq qulingiluat missaanni ilineqarput nalunaaqutarlu aqqaninngormat naajat 52-it toqunneqareersimapput, Kommune Kujallermi pisuussutinik uumassusilinnik nakkutilliisoq Otto Kielsen KNR-imut unnersiorpoq.

Pullatit Qaqortumi sananeqarput. Taakku meterinik marlunnik takissuseqarput 60 centimeterinik portussuseqarlutik. Narajalerneqartarput naajat pulateqqaarlutik tigusinnaasaannik. Tassanili tassa pisarineqartarput sulukkaajunertik pissutigalugu anillassinnaajunnaartaramik.

- Nerisassat pisiniarfinnit igitassat atorneqarsimapput. Ilaatigut rundstykkit nerisassakullu allat narajarineqarsimapput, pisuussutinik uumassusilinnik nakkutilliisoq Otto Kielsen oqarpoq.

Nanortalimmi ikuallaaveqanngimmat eqqaavissuaq ammaannartoq naajarpassuit tulugarpassuillu nerisassarsiorfigisarpaat. Pullatilli pitsaagaluarlutik suli iluarsilaagassaapput.

- Tulukkanik pisaqarsimanngillat. Taamaattumik iluarsiniassavarput aamma tulukkanik pisaqarsinnaasunngorlugu, Otto Kielsen oqarpoq.

Qaasuitsup Kommuniani naajarpassuit aamma ajornartorsiutaapput. Avannaamiullumi Kommune Kujallermut tusarniaareersimapput pullatit tusaamalerlugit. Kujataani pullasiortut norskit isumassarsiorfigisimavaat tasakku pullaserlutik aamma naajarniarpaluttarmata.