Nanortalimmi innuttaasut coronamik tunillatsittoqarsimanera toqqissisimanngissutigaat
Nunatsinni qaammatini marlunni coronartoqanngereerluni, Nanortalimmi 1100-it missaannik innuttaasoqartumi tallimanngormat nassaartoqarpoq.
Umiarsuarmi ilisimatusaammi ilaasoq coronavirusimut misissortinnermini coronartoq paasineqarpoq.
Umiarsuaq marlunnik ilaasoqarpoq 15-inillu inuttaqarluni. Taakku tamarmik akunnerni arlalinni Nanortallip illoqarfittaaniissimapput.
AAMMA ATUARUK Coronamik tunillatsissimasoq Nanortalimmi paasineqartoq
- Nukappiaraatiga pisiniarfimmut ilagalugu qanoq sissuernartigisoq misigereerlugu, pisiniarfimmut ilageqqikkusunngilarput, suli mikigami sissuernissani suli nalulaaramiuk.
- Massakkut torersaaneroqaagut, ullut tamaasa eqqiaaginnavittarpugut.
Taassuma coronaviruseqartoqarneranut atatillugu sapaatip akunnerata naanerani aalakkuttut takusimasani toqqissisimanartinnagit, innuttaasut sissuernissaannik kissaateqarpoq.
- Nunaqqatikka piumaffigerusunnaqaat, nakorsaaneq ataqqinarpoq aap, eqqississaanera eqqissiallannaraluarpoq. Kisianni aalakoortut qanoq amerlatiginersut ilaallu ilanngullugit, soorlu coronaviruseqartoqartoq soqutigerpasinngikkaat.
- Sissuernerunissaannik mianersornerunissaannillu suli kaammattoqqunaqaat.
Meeqqat oqaaqqissaarneqarli
Nanortalimmi innuttaasut oqaloqatigineranni tusarsimasaasa ilagaat meeqqat umiarsuarmeersunik attaveqarsimasut.
45-nik ukiulik Erik Frederiksen marlunnik meeraqarpoq. Taassuma takornariat tikerartillugit meeqqat sissueqquneqarnerunissaat kaammattuutigaa.
- Nalunngilara meeqqat uagutsinniit qanoq angalapallallaqqinnerusarnersut, oqaaqqissaanngikkaannilu attugassai qanoq amerlasartiginersut. Kisianni aamma uagut meeqqaninngaanniit nakkutigisassaanerusimassaagut, meerarput nassuiaassinnaasimanngikkutsigu.
- Meeqqat naluaat takornariat qanoq issinnaanersut, imaassinnaavoq nappaateqarsimasinnaasut immaqaluunniit eqqumiikajaartumik siunertaqarsimasinnaasut.
- Taamaammat uanga meeqqakka takornarianut ornigutsiinnarnavianngilakka, immaqaluunniit angallataannut pulaartillugit tasiortillugilluunniit allamukaqatigitillugit.
AAMMA ATUARUK Nanortalimmi tunillatsittoqarneranut tunngatillugu nakorsaaneq eqqissisaavoq
Illoqarfimmi tusatsiakkat nakorsaanerup Henrik L. Hansenittaaq uppernarsisimanngilai.
Umiarsuup ilisimatusaatip Nanortalimmiinnerata nalaani, meeqqat umiarsuarmut attaveqarsimanerat ilumoorpa?
- Inunnik ataasiakkaanik attaveqartoqarsimanersoq, politiit uppernarsarniarlugu misissuiffigileruttorpaat.
- Nanortalimmili tuniluuttoqarnissaa ilimanaatikitsuaraasoq oqaatigisinnaavarput, nakorsaaneq KNR-imut oqarpoq.
Arsaattoqannginnissaa ernumagineruleraa
Erik Frederiksen Nanortalimmi arsaattartunik Eqaluk 54-inik sungiusaasarpoq, taakku nunatsinni pissartanngorniutivinnissamut annguteqataanikuupput.
Corona peqqutigalugu pissartanngorniutivinnissaq unitsiinnarneqarnikuuvoq, taamaakkaluartorli ingerlanneqarnissaanik kaammattuuteqartut arlaqarput. Nanortalimmili coronartoqalerneranut atatillugu periarfissanut akimmisaartitsissanersoq sungiusaasumit ernumanartoqartinneqarpoq.
- Allat eqqaannginnakkit, tassa immaqa aamma GM-imi arsarniarsarisut GM-ersinnaajunnaassapput, GM-ertoqaleriataassagaluarpat.
