Nanoq piaraalu Kulusummi mittarfimmi angalaartut

Nanoq piaraalu  Kulusummut ullumi aqqusaarput. Tamanna mittarfimmi sulisumit videolianit assinillu takuneqarsinnaavoq.

Nannut nunaqarfiup mittarfiatigut angalaarput, videolianilu Mittarfeqarfinniit biili nannut marluk tungaanukarluni qimaatitsisoq isiginnaarneqarsinnaavoq.

Kulusuup Mittarfiani sulisup Kornilius Poulsenip biilerluni nannut Kulusuup mittarfianiittut videoliarai pingasunngornermi ullaap tungaani.

-  Biilinik mittarfikkoorlunga nanoq piaraarlu qimaatinniarsaraakka ingerlaannarlu qimaapput Ittortarpii tungaanut. - Ungasillillutik tarripput, Kornilius Poulsen oqarpoq. 

Tunumi timmisartunut mittarfimmi nannumik aatsaat takusaqartoqalinngilaq. 

- Aputaajaanitsinni nannut tumaannik aamma takusaqarnikuuuvugut, Kornelius oqarpoq.

Kalaallit Nunaanni Politiit pigaartuisa pisortaata, Anette Ostenfeldtip nunatta kangiani nunaqarfimmi nanoqarneranik nalunaaruteqarfigineqarsimallutik uppernarsarpaa:

- Aap, Kulusummi nanoq piaraalu takuneqarput, qunutinnissaallu iluatsinneqarluni, taanna oqarpoq.

Illoqarfiup kommunefogedia allanit arlalinnit ikiorneqarluni nannut illoqarfimmiit qimaatippaat. Tamanna qanorpiaq pisimanersoq taanna ilisimanngilaa.

- Nanoq anaanaq aallaarusunngilarput, taamaattoqarpammi tamanna piaqqamut ajutoorutaassaaq. Taamaammat taama pisoqaraangat sapinngisatsinnik qunutitsiniaasarpugut, Anette Ostenfeldt oqarpoq.

Taamaammallu allamik iliuuseqarnissamut maanna pilersaaruteqanngilaq.

- Nannut uteqqissanersut soorunami nakkutigilluarparput, kisianni inuit nunaqarfiup qanittuani nanoqarsimasoq sillimaffigissavaat, pigaartut pisortaat oqarpoq.