ASSIT Nanoq hiistitortoq savaatillip toquppaa
Nanortallip pigisaani Tasiusami savaatillip Malik Frederiksenip hiistimi nannumit nerineqarnerata kingorna nanoq toquttariaqarsimavaa.
Nanoq Malik Frederiksenip savaateqarfianut qaninngoormat qimaatinneqarsimagaluarpoq, hiistimili ilaata nannumit nerineqarsimanerata kingorna nanoq ippassaq ullaakkut toquttariaqarsimavaa, Malik Frederiksen Radioaviisimut taama oqaluttuarpoq.
Kujataani savaateqarfiit eqqaanni nannut takussaaleraluttuinnarnerat Malik Frederiksenip oqaluttuaraa.
- Nannut savaateqarfinnut qaninngoortut qamuteralannik ornillugit qimaatinniartarpagut, Malik Frederiksen oqaluttuarpoq.
Hiistiuterpulli nerimmagu sillimaniarneq pissutigalugu toquinnartariaqarpara.
Nanoq savaateqarfimmit meterinik 500-nik qanitsigisumi aallaaneqarpoq.
Nanoq toqoreerlugu Malik Frederiksen piniarnermut naalakkersuisoqarfimmik akuersissummik pisimavoq.
Allatut iliornissaq ajornarsimammat toqunneqarnissaa akuerineqarpoq, allaffimmi pisortaq Amalie Jessen KNR-imut oqarpoq.
Malik Frederiksen erninilu nanoq hiistitornikoq assileqatigigaat.
