Nannut Savissivimmi innuttaasut piliaannik nerisut
Nanoq piaraalu marluk nunaqarfimmi Savissivimmi Qaanaamit kujammut 190 kilometerit missaanniittumi aggustip aallaqqaataani takuneqaqqaarput, nunaqarfimmilu eqqaanilu aggustip tallimaata tungaanut takuneqallattaasimapput.
- Siullermik nunamut pigamik taakkua inuit immaqa qaninngooriaramigit arnaata tungaanut aallariaraluartoq nilliammata unissimavoq. Saassusinanilu qujanartumik, Savissivimmi kommunefoged, Gabriel Halsøe oqarpoq.
Nannut pingasut Savissivimmi innutaasut 60-it missaanniittut ilaasa piliarisimasaat nungullugit nerisimavaat.
Pingasoriarlutik qimaatinneqartut
Savissivimmullu nannuttassiissutit nungunneqareermata, nunaqarfimmiut nannut ujaqqanik milloorlugit aallaammillu qummut seqqorlutik qimaasittariaqartarsimavaat.
AAMMA ATUARUK Upernavimmi Savissivimmilu nannunniarneq unippoq
Nannulli piarallit ulorianartorsiorsorisut ulorianarsinnaasut, kommunefoged oqarpoq.
- Ulorianaramik nannut, taava piaqqaminnik illersuisaramik taava soqutigisaarulluni qanoq pineqaraluaruni akiuuterujussuartarluni qanoq pineqaleraangamik, Gabriel Halsøe oqarpoq.
Nannulli pingasoriarlutik aggustip aallaqqaataanit tallimaanut qimaatinneqartarsimapput, Savissivimmulli uteqqissinnaammata, kommunefoged Gabriel Halsøe innuttaasunut mianersoqqusivoq.
Kommunefoged mianersoqqusisoq
- Mianersuuttariaqarput inuit. Mianersorfigisariaqarpaat annertuumik. Qanillivallaarnaveersaarlugit isiginerinik imaluunniit illumiit anigaanni qineqqissaarluni suna tamaat misissoqqissaarlugu, Kommunefoged Gabriel Halsøe oqarpoq.
Pisassiissutit nungukkaangata, nannullu nunaqarfimmi innuttaasunut ulorianartorsiortitsileraangata piniartut piniarnermut naalakkersuisoqarfimmut immikkut akuerisamik pisassinneqarnissaminnut qinnuteqarsinnaasarput.
Savissivimmiilli qinnuteqartoqarsimanngitsoq naalakkersuisoqarfik KNR-imut pingasunngormat ilisimatitsivoq.