Nannup tumerisinnaasaa Nuup eqqaani siumorneqartoq
Politiit nannup Nuummi Qallussuup eqqaani tumerisinnaasaa pillugu sapaatiummat nalunaaqutaq 17:58 nalunaarfigineqarput.
- Qallussuup eqqaani apummi nannup tumiatut isikkoqarsinnaasumik takusimapput. Tamatuma saniatigut allamik malugisaqartoqanngilaq, politiineersoq Johan Westen oqarpoq.
- Ilumut taamaattoqarnersoq oqaatigisinnaanngilara, taanna ilanngullugu oqarpoq.
Saaffiginnissut ataaseq
Politiineersoq naapertorlugu politiit Nuummut eqqaanullu tunngatillugu qaqutigut taama nalunaarfigineqartarput.
Politiit sumiiffimmi nannup tumerisinnaasai pillugit allamit nalunaarfigineqanngillat.
Inuilli arlaannik pasinartumik tuminilluunniit qimmit tumiinit annerorpasittunik siumuisoqassagunik saaffiginninnissaat, politiineersup kaammattuutigaa.
Politiillu maannakkuugallartoq iliuuseqarnerunavianngillat.
- Inuit sumiiffimmi allami tuminik allanik siumugaqarsinnaanissaat eqqarsaatigalugu ullormut unnuarmullu nalunaarusiatsinni allapparput, politiineersoq oqarpoq.
