Namminneq piumassutsiminnik qamisaasut qatserisartunit paarlanneqarput
- (Namminneq piumassutsiminnik qamisaallutik, aaqq.) ikiuuttut amerlanerpaagamik 25-t missaanniipput massakkullu ikiliartuaarusaarput, upalungaarsimanermut pisortaq, Ole Kreutzmann oqarpoq.
AAMMA ATUARUK Nuna ikuallattoq ima qamisarneqassaaq
Nuna 19 km2-isut isorartutigisoq ikuallareerpoq. 700 meterisullu isorartutigisoq avannamut nuna suli ikumasoq, upalungaarsimanermut pisortap paasissutissiissutigaa.
Sapaammili qamisaasut
Sisimiut avannamut kangiatungaani Kangerluarsuk Tullermi nuna ikuallammat inuit namminneq piumassutsiminnik
unnuaqarnatik sapaammili qamisaapput.
- Ikuallattup illuaqqanut siaruaannginnissaa taakkua ikiuulluarneratigut qujanartumik iluatsippoq. Qujanartorujussuupput, qujaannarnerluunniit amigarpoq, Ole Kreutzmann oqarpoq.
AAMMA ATUARUK Tupannartorujussuuvoq
Sisimiut eqqaani nuna ikuallattoq juulimi qaminneqaraluarpoq, sorlaalli nunap iluani ikumasimammata nuna ikuallaqqilerpoq.
Qamisaanermi periuseq alla atorneqartoq
Qatserisartut nunatsinnut, unnuaq nalunaaqutaq pingasunngulersoq, tikisinneqartut 38-t qatserisartullu nunatsinneersut ilaatigut nunamut kapuutit qatserutitallit atorlugit sorlannik qamisaapput.
- Pakkersimaarinninnermi siaruatsaaliinermut pilersitaq tassaasarpoq nunap ilua imermik immerlugu, qaavalu masatserluarlugu, kisiannili pingaartumik nunap ilua imermik annertuumik immerlugu, brandbæltiliorneq. Taamaalilluni nunap iluatigut siaruaannissaa pinngitsoortinneqassaaq.
Qatserisartullu sapaatit akunneri marluk missaanni suli sulinissaat, Ole Kreutzmannip naatsorsuutigaa:
- Avannaatungaaniikkami Uutap Kuua, taannalu qaangeruniuk nunarujussuaq annertooq ikuallalersinnaagami, Qeqqata Kommuniani upalungaarsimanermut pisortaq, Ole Kreutzmann, oqarpoq.
Sakkutuut timmisartuannit Challengerimit Sisimiut eqqaanni ikuallattoq ulloq aggustip arfineq-pingajuanni immiunneqartoq.