Neqi A/S-ip kommuni aalajaatsunik sulisoqarnissamik suleqatigissagaa
Narsamiittoq Neqi A/S aalajatsunik sulisussaaleqisimavoq.
Tamanna pissutigalugu Neqi A/S-ip isumaqatigiissummi piumasaqaatit, siorna Pinngortitamut Avatangiisinullu Naalakkersuisoqarfimmut isumaqatigiissutaasa eqquutsinnissaat ajornakusoorpoq.
Taamaammat toqoraavik Kommune Kujallerlu ilaatigut Narsamit illoqarfinniillu allanit sulisussarsiornermik suleqatigiipput.
- Assersuutigalugu illoqarfimmi suliffissarsiortut ikiorlugit piginnaasaannik qaffassaaniarput, tamannalu Neqi A/S-ip piginnaanngorsaaqqinnermut aaqqissuussaq najoqqutaralugu tallimanik sulilersitsineranik malitseqarpoq, Neqi A/S-imit Ole Vestergaard tusagassiuutinut nalunaarummi allappoq.
AAMMA ATUARUK Neqi A/S angusaqarluartoq
Pinngortitamut Avatangiisinullu Naalakkersuisoqarfimmut isumaqatigiissut naapertorlugu toqoraaviup savaaqqat savallu toqutat perlukuinik nerisassiassaanngitsunik qanoq periuseqarnissaq isumaqatigiissutigaat.
Aalajaatsunilli sulisussaaleqineq pissutigalugu perlunik qimminut nerukkaatissanik suliaqarnissaq ajornakusoorsimavoq.
- Savanik toqoraaviliaassuineq aallartikkaangat savaaqqallu Narsaliaanneqaraangata toqoraaneq ingerlaannarneqartussaasarmat sulinerup ingerlarnga kigaallatsinneqarsinnaasanngilaq, taamaaliornerlu pingaarnersiuineruvoq, Ole Vestergaard ilisimatitsivoq.
Toqoraavimmit eqqakkat ikilisinneqassasut
Savap ataatsip perlukui 9,3 kiilut missaat isumaqatigiissuteqannginnermi nunamut assaanneqartarput. 2,2 kiilulli missaat Namminersorlutik Oqartussallu isumaqatigiissut naapertorlugu nunamut assaanneqartalissapput.
AAMMA ATUARUK Mange kunder til kartofler fra Neqi A/S, når kvaliteten forbedres
Savaaqqap 30 kiilup perlukuinit 2 kiilut missaat assersuutigalugu qimminut nerukkaatissiarineqassapput. Perlukuinit imerpalasoq 4,7 kiilu imaanut iginneqassaaq 1,3 kiilullu ikuallanneqassallutik.
Neqi A/S-ip tamatuma saniatigut 5 kiilut missaat tunisassiarisassavai. Taakku tassaapput savap tingui, niaqua amialu.
Taakkua isumagineqareeraangata savaaqqap neqaa 15,5 kiilup missaanniittoq aattorneqariaannanngortarpoq.
- Ataatsimut isigalugu savaaqqat savallu 20.000-t missaat toqoraanermi ataatsimi perlukui iginneqartartut 100 tonsit missaannik ikilissapput, Neqi A/S-ip tunisassiorfiani pisortaq Ole Vestergaard ilisimatitsivoq.
