Brugseni: Naatsiiat Neqi A/S-iimeersut pitsanngorpata pisisussaqaqaaq
- Ukioq manna 20 tonsit missaat tunivagut, ukiup siuliani aamma taamatut. Kalaalit nunaani Brugsenimi pisiortornermut pisortaq, Niels Mathiassen, oqarpoq.
Naatsiiat pitsaasusaasa ukiut siuliini qaffasinnerusimagaluarnerat maluginiarneqarpoq.
- Ukiut arlallit matuma siorna naatsiianik amerlaneroqisunik pisiniartaraluarpugut. Isumaqarpunga ukioq ataaseq pisiaqarnerpaagatta 50 tonsit missaat pisiarisimagigut, Niels Mathiasen oqarpoq.
Kujataani naatsiianik naatitsisartut siorna naatsiiat naatitaasa katillugit 110 tonsiusut kingusissukkut aatsaat Neqi A/S-imut assartortariaqarsimanerat naatsiiat 40 tonsit asiusimerannut Neqi A/S-ip pissutaatippaa.
Savaaqqanik naatsiianillu Neqi A/S-imut ataatsikkut assartuisoqarnera, naatsiianik kingusissukkut assartuisariaqalernermut pissutaasoq, Neqi A/S-i-miit nassuiaatigineqarpoq.
AAMMA ATUARUK Savat neqaannut naatsiianullu akit isumaqatigiissutigineqartut
Tamannalu kinguneqarnerluppoq.
- Pitsaassusaat ajornerulaalersimapput, qorsuttaqarnerulersimallutik, ilaasalu ilui asiusarsimallutik. Taamaammat pisisartut amerlasuut pisiarerusuttarsimanngilaat, pisiortornermi pisortaq oqarpoq.
Naatsiiallu Neqi A/S-imut ukioq manna tunineqartussat pitsaasusaat aamma qaffasinnerussasut siunniunneqarpoq, soorlu pisiarineqannginneranni pitsaasusaat Neqi A/S-imit misissorneqaqqaartalissasut, Neqi A/S-imit oqaatigineqarluni. Tamannalu neriulluarfigineqarpoq.
- Pitsaassusaat pitsanngorpat pisiniarfitsinni tamani tunisaqarnerujussuusinnaavugut, Niels Mathiassen oqarpoq.
Pisisartummi aamma naatsiianik pitsaasunik pisiaqarnissaminnik pingaartitsipput.
- Mamartuusariaqaramik kartoffilit, Qaqortumi pisisartut ilaat Esther Kleist oqarpoq.
Pisiffik Pilersuisorlu tamarmik immikkut Brugsen-itulli naatsiianik nunatsinneersunik 20 tonsit missaannik aamma ukioq kingulleq tuniniaasinnaasimapput. Neqi A/S-imit siusinnerusukkut oqaatigineqarpoq, naatsiiat 50 tonsit iginneqartariaqarsimasut maannali imminnut naqqillutik 40 tonsit iginneqartariaqarsimasut oqaatigaat.
