Namminersorlutik Oqartussat: KNR USA-mut angalanermini tapiissuteqarfigineqarnermini inatsimmik unioqqutitsivoq
KNR-ip amerikamiut tapiiffigisaannik tusagassiortut marluk USA-mit ilanngutassioriartortillugillu aallakaatitassioriartortimmagit inatsimmik kukkussuteqartoqarsimassagunarpoq.
KNR-ip piumasaanik Ilinniartitaanermut, Kultureqarnermut Ilageeqarnermullu Naalakkersuisoqarfiup inatsisilerinermik immikkoortortoqarfiata naliliinerani tamanna allassimavoq.
Paragraf 48-mi qanoq allassimasoqarnera
- Aallakaatitassianut aningaasalersuisarnerup iluaniipput radiukkut tv-kkulluunniit aallakaatitassianut, tassunga ilaallutik tekst-tv-mi imaluunniit internetikkut elektroniskiusumilluuniit periarfissat allat atorlugit takutitanut toqqaannartumik toqqaannanngitsumilluunniit tapiissutit suulluunniit, inuup ingerlatsiviulluunniit aallakaatitsinermik aallakaatitassiornermilluunniit ingerlataqartuunngitsup, atermi, ilisarnaatimi (logo), kinaassutsimi, ingerlatami nioqqutissiamiluunniit ilisimaneqarnerulernissaat siunertaralugu aningaasaliiffigisai
Paragraf 48 imm. 6-imi ima allassimavoq
- Aallakaatitassiat nutaarsiassanik maannarpiarlu soqutiginartunik imallit aningaasalersorneqaqqusaanngillat
Tigusiffik: Radiokkut tv-kkullu aallakaatitsisarneq pillugu Inatsisartut Inatsisaat nr. 7, 8. Juni 2014-imeersoq
- USA-mit aallakaatitassiat, amerikamiut nunanut allanut tunngasunut ministereqarfianit aningaasalerneqartut radiukkut tv-kkullu aallakaatitsisarneq pillugu Inatsisartut Inatsisaat paragraf 48 imm. 6-imik aamma pilerisaarisarnermut nalunaarummik paragraf 29-imik qaangiinnaassapput, Marcus Dalro inatsisilerinermik siunnersuisuuneq nalunaajaanermi allappoq.
Tusagassiortut aallartinneqartut marluk piffissami angalaffiusumi KNR-ip nutaarsiassaqartitsiviani atorfeqarput. Angalanerat ullunik aqqaneq-marlunnik sivisussuseqarpoq, USA-llu taakku Københavnimit angalanissaat akunnittarfimmilu ineqarnissaat akilerpaa.
Oqartussat, inuussutissarsiuteqartut kalaallillu USA-mi najugaqartut apersorneqarput.
USA-miillu piumasaqaataasoq atasiinnaavoq, tassa angalanermit KNR-imit saqqummertoqarnissaa – sunali pillugu qanorlu annertutigisumik piumasaqartoqarani.
AAMMA ATUARUK Periarfissat, pissaaneqarniuunneq, aningaasallu: USA-p nunatsinnut soqutiginninnera annertusiartortoq
KNR-ip angalatitsinnginnermini USA-p suliarineqartunut sunniuteqannginnissaa aallartoqannginnerani qulakkeeqqaarsimavaa.
Kalaaleq allanit tunuliaqutarani saqqummiisartoq qisuariartoq
Oqartussanit tapiissuteqartoqarnera kalaallip nammineq allanik tunuliaqutaqarani saqqummiisartup, Qarsoq Høegh-Damip, Facebookimi quppernermini 5.000-init malinnaaffigineqartup qaqippaa. Taassuma Facebookimi videomi, minutsinik qulinik sivisussuseqartumi KNR-ip USA-mik aningaasaliiffigineqarsimanera isornartorsiorpaa.
Taassuma USA-p soqutigisaminik siuarsaaniartuunera erseqqissaatigaa.
- KNR neqeroorfigineqarami angeriarlugit nutaarsiassiivoq, nutaarsiassaqartitsivimmi sulisuni atorlugit, periarfissat kisimik misissorniarlugit. Nutaarsiassat positiviungaatsiartut isornartorsiuerpalunngitsut, naak nutaarsiassat ataanni nutaarsiassatut taallugit avataaniit aningaasalersorneqaqqusaanngiivikkaluartut, Qarsoq Høegh-Dam videoliamini oqarpoq.
KNR isornartorsiuisoqarnera tunngavigalugu inatsisilerituumit naliliititsiniarluni aalajangerpoq. Naliliinermi KNR radiokkut tv-kkullu aallakaatitsinermini inatsimmik unioqqutitsisimassasoq matumani nalilerneqarpoq.
Namminersorlutik Oqartussani inatsisilerituut ilanngutassiat marluk aallaavigaat. Naliliineranni angalanermit ilanngutassiat saqqummiunneqarnerat ajornartortaqanngitsoq erseqqissaatigineqarpoq. Inatsimmili radiokkut tv-kkullu ilanngutassiaat pineqarput.
- Naalakkersuisoqarfiulli tamatumunnga atatillugu nutaarsiassatut ilanngutassiat marluk taakku radiokkut tv-kkullu aallakaatitsisarnermut inatsimmik § 48, imm. 6-imik unioqqutitsinngillat, tassami ilanngutassiat KNR-ip nittartagaaniipput, taakkulu radiokkut tv-kkullullu aallakaatitassianut nutaarsiassanut maannarpiarlu soqutiginartunut imalinnut inatsimmut tunnganatik, naliliinermi allassimavoq.
Tusagassiuutilerinermut inatsisileritooq tapersiisoq
KNR-ip angalanermut atatillugu suliaq Odensemi Syddansk Universitetimi tusagassiuutilerinermi inatsisilerituumut, Sten Schamburg Müllerimut aamma naliliiffigitippaa. Taassuma kalaallit inatsisaannut immikkut ilisimasaqarani erseqqissaatigaa, inatsilli atuakkani danskit inatsisaannut assigiinngitsorpassuartigut assingunerarlugu.
- Inatsimmi tassani aningaasanik tapersersortilluni nutaarsiassanik maannalu pisunik aallakaatitsisoqaqqusaanngitsoq allassimavoq, aningaasanillu tapersiineq toqqaannanngitsumik aningaasaliissuteqarneruvoq, Sten Schamburg Müller oqarpoq.
- Naak angalanerat tamakkiisumik akilerneqanngikkaluartoq, tapiissuteqarnerummat aningaasanik tapersiineruvoq. Nutaarsiassanulli maannakkorpiarlu pisunut soqutiginartunut tunngatillugu taamaaliortoqaqqusaanngilaq, tusagassiuutit pillugit inatsisileritooq oqarpoq.
AAMMA ATUARUK Hanne-Marie USA-mi najugaqarpoq: Angerlarlunga inuusuttut ilisimatusarnermut pinngortitamillu ilinniartikkusuppakka
Sten Schamburg Müllerip Danmarkimi ukiualuit matuma siorna suliaq eqqaavaa. Tassa DR-imi aallakaatitassiaq, Café Hack assersuutigalugu kommuninit aningaasalersorneqartoq saqqummersinneqarpoq.
- Inatsisillu malillugit DR taamaalioqqusaanngilaq.
Taamaammat taassuma oqarnera naapertorlugu DR-ip aallakaatitassiat taakku peertariaqarsimavai.
Nutaarsiassaqartitsiviup pisortaa: Maannakkut atuaqqissaassaagut
KNR-ip inatsisilerituut naliliinerat tusaatissatut tigugaa, nutaarsiassaqartitsinermi pisortap, Mikkel Bjarnø Lundip oqaatigaa.
Inatsisilerituut naliliinerat qanoq qisuariarfigaajuk?
Kiffaanngissuseqarnermut immikkoortoq:
Aallakaatitassiani takisuulianilu tamani USA-mut angalaneq USA-mit tapiissutigineqartoq KNR-imit ima oqaasertalerlugu ilisimatitsissutigineqarpoq:
- "KNR-ip amerikamiut nunarput pillugu qanoq eqqarsaateqarnersut paasiniarlugu USA tikeraarpaa. Periarfissat suuppat nunatsinnullu qanoq periarfissiippat? USA-mut angalaneq amerikamiut nunanut allanut ministereqarfianit akilerneqarpoq, ministereqarfiup nunat allat nutaarsiassaqarfiisa USA pillugu nutaarsiassaqarneranni tapiissuteqarfiginiarlugit neqeroorutiginikuuaa. Amerikamiut nunanut allanut ministereqarfiata tusarfigisagut qanoq apersorneqarnissaat qanorlu allaaserinnissanersugut sunniuteqarfiginngilaat.”
Tigusiffik: KNR
- Taanna soorunami atuaqqissaartariaqarparput, inatsisillu paragrafillu tamarmik malinnissaat qulakkeertariaqarparput. Ileqqorissaarnermut eqqortumillu iliornissamut kukkusumik iliorsimalluta misigisimanngilagut.
AAMMA ATUARUK USA-p mittarfiit pingasut misissorai: Februaarimi aalajangerataannaavugut
- Aaqqissuisunit tusagassiornermullu kiffaanngissuseqarnissatsinnut qulakkeerisimavugut. Taamaalilluta kiffaanngissuseqartumik paasissutissanillu isornartorsiuisunik piumasaqaataasunik atuisartutsinnut qulakkeerivugut.
Aqutsinermi suliaqarnermik naammattumik suliami matumani iliuuseqarlusi isumaqarpit?
- Inatsisit paragraffillu tamarmik malinnissaannik qulakkeerinissarput pisussaaffigaarput. Matumani allaanerusumik paasinnippugut. Aaqqissuisunit kiffaanngissuseqarluarnissamik qulakkeereriaratta tamanna aningaasanik tapersiiffigineqartutut isiginngilarput, nutaarsiassaqartitsinermi pisortaq, Mikkel Bjarnø Lund oqarpoq.
Nutaarsiassaqartitsinermik pisortap oqarnera naapertorlugu KNR-ip ilanngutassiat aallakaatitallu suliarineqarsimasut qanoq iliuuseqarfiginissaat maanna aalajangiiffigissavai.
