Namminersorlutik Oqartussat kommunip Qeqqata Akademimut iliuuseqarnissaanik ujartuipput
Qeqqata Kommuniata Piareersarfiup namminersortunngorsarnissaa iluatsinngimmagu, suliassaq Qeqqata Akademimut suliassanngortinneqartoq, Sermitsiaq allappoq.
Inuussutissarsiornermut, suliffeqarnermut niuernermullu naalakkersuisoqarfiup Qeqqata Kommuniatalu allaffigeqatigiinneranni allakkat Sermitsiap allagaatinik takunnissinnaatitaaneq aqqutigalugu pissarsiarisimavai.
Allakkanilu atuarneqarsinnaavoq, Namminersorlutik Oqartussat aallartitaat nakkutilliiartorlutik siorna oktobarimi novembarimilu pulaarnerata kingorna arlalinnik isornartorsiuteqartut apeqqutissaqarlutillu.
Ilinniartut takkunneri aqukkuminaasinneqartut
Ilaatigut sannavimmik suliniummi ilinniartut takkuttarnerisa aqunneqaruminaatsinneqarneri isornartorsiorneqarpoq.
Aamma ilinniartut naammattumik ilikkagaqarneq ajornerat, angajoqqaaniit naammagittaalliuutigineqarpoq. Naalakkersuisoqarfimmiillu aallartitat nakkutilliiartornerminni tamanna aamma misigaat.
Sannavimmik suliniummi sulisut arlallit atuartitsinermut tunngasunik tunuliaqutaqannginneri aamma isornartorsiorneqarpoq.
- Ilinniartitsisut piukkunnaataat piginnaasaallu namminersortunngorsaanerup kingorna annertuumik ajorseriaateqarsimasutut isumaqarfiginarput, Sermitsiaq naapertorlugu naalakkersuisoqarfik allappoq.
Tamannalu pillugu Namminersorlutik Oqartussat kommunip iliuuseqarnissaanik ujartuipput.
Piareersarfillu namminersortunit ingerlanneqaraluartoq Qeqqata Kommunia oqartussaasutut suli akisussaasuusoq, Namminersorlutik Oqartussat aamma eqqaasitsissutigaat.
Qeqqata Kommunia Piareersarfik Sisimiuniittoq julip aallaqqaataani 2014-imi ingerlatsilerpoq.
