Namminersorlutik Oqartussat coronavirusimut misissuissutinik Amerikamit pisisut
Namminersorlutik Oqartussat COVID-19-imut misissuissutinik 5.000-nik Amerikami suliffeqarfimmit Cepheidimit pisipput.
Misissuissutit siulliit tikereerlutillu atorneqalereerput. Amerikamiut nunanut allanut ministereqarfiat USA-llu Københavnimi aallartitaqarfia ikiortigalugit pisiaraat.
Naalakkersuisut tusagassiorfinnut taama nalunaarput.
”Kalaallit Nunaanni COVID-19-imut misissuissutit 5000-t qanittukkut pigilissagivut nutaarsiassaavoq nuannersoq. Misissuissutit nutaat iluaqutigalugit sukkanerusumik pisariinnerusumillu misissuisinnaalerpugut,” nunatsinni nakorsaaneq, Henrik L. Hansen, oqarpoq.
AAMMA ATUARUK ASSILIARTAT: Coronavirusi timimi ima iliortarpoq
Misissuisarfik nutaaq Nuummi Dronning Ingridip Napparsimmavissuani qaammatip matuma siuliani pilersinneqarpoq. Taamaammat coronavirusimut nunatsinni pisariinnerusumik misissuisoqarsinnaanngorpoq, pilersinneqanngikkallarmammi misissukkanit tigusat misissugassanngorlugit naalagaaffiup nappaatinut akiuussutissaliorfianut, Statens Serum Institutimut Københavnimiittumut nassiunneqartarsimammata.
Misissuisarfilli akisoqimmat qaammammit ataatsimit sivisunerusumik atuunnissaa pilersaarutaanngikkaluarpoq, immikkummi ilisimasallit avataaneersut ilaatigut ikiortigineqartariaqarmata. Naalakkersuisummi oqarnerat naapertorlugu misissuissutit najukkani sulisunit atorneqarsinnaammata taakkuninnga pisineq qujanarpoq.
AAMMA ATUARUK Napparsimavit, peqqippit angerlarsimaannaqqusaavilluunniit? Taamaappat innersuussutit qimerluukkit
”Misissuissutit nutaat ingammik tuberkulosemut misissuinermut atortumi Nuummi pigeriikkatsinni atorsinnaagatsigit atoruminaqaat. Misissueriaaserlu tamanna misissueriaasereriikkatsinnit pisariinneroqaaq, misissukkammi inernerinik nalunaaquttap akunnerata ataatsip ingerlanerinnaani akissutisisinnaaleratta," nunatsinni nakorsaaneq, Henrik L. Hansen, oqarpoq.
Novo Nordisk Fonden 2,8 millionit koruuninik nunatta coronavirusimut misissuissuteqalernissaanut tunissuteqarpoq. Tassanngalu aningaasaliissutit ilaat misissuissutissanik Amerikamit pisissutaapput.
Nunatsinni inuit COVID-19-imut misissortissimasut maannamut 1.505-iupput. Tunillanneqarsimasutut nalunaarsukkat aqqanilliupput, taakkulu tamarmik peqqisseqereerlutik.
