Namminersorlutik Oqartussat 80 million kr-nut itigartitsipput

Nuuk umiarsualivittaassaaq. Tamanna ataasinngormat  tusarliunneqarpoq.  Umiarsualivik Namminersorlutik Oqartussat tamakkiisumik pigissavaat.
Attaveqatigiinnermut Naalakkersuisuusimasup Demokraatit siulittaasuata  Jens B. Frederiksen-ip  umiarsuliviliortoqarnissap piviusunngortinneqarnissaa nuannaarutigaa.

- Nuannaarutigaara Naalakkersuisut  siuliisa aalajangigaat ingerlatinneqarmat  maannakkullu  Naalakkersuisuusut tamanna naqissusermassuk, Jens B. Frederiksen oqarpoq.

Jens B. Frederiksenilli nuannaarnera tassunga killeqarpoq.
Jens B. Frederiksen attaveqarnermut naalakkersuisuunermi nalaani,  umiarsualivimmik piginneriaatsit assigiinngitsut marluk inatsisartunut saqqummiutissallugit piareersimatitsisimagaluarpai.
Siullertut Nuummi umiarsualivik tamakiisumik Namminersorlutik Oqartussanik pigineqartoq aappaatullu Kommuneqarfik Sermersooq aamma Royal Arctic Line kiisalu Aalborg-imi umiarsualivik  aningaasaliissasut takorloorneqarsimavoq

 
- Kommuneqarfik Sermersooq 40 millioner kr-nik aningaasaliinissaminut piareersimasimavoq, aamma Aalborg-imi umiarsualivik Aalborg Havn kiisalu Royal Arctic Line tamarmik  immikkut 20 millioner kr-nik aningaasaliinissamut piareersimallutik, Jens B. Frederiksen oqarpoq,  taakkua saniatigut atuisartut akiliuutaannik umiarsualivissaq matussuserniarneqartussaagluarpoq. Maanna umiarsualivissap allatut ilusilerlugu aningaasalersorniarneqartussanngormat  akit qaffasinnerusussanngorput,  taamaattumik uggorivara tamanna inatsisartunit isummersorfigineqarsinnnaanngimmat Jens B. Frederiksen taama oqarpoq.