Namminersorlutik Oqartussani mamianartuliat pigaluttuinnarput
Berlingske Business taama allaaserisaqarpoq, tamannalu pissutigalugu Aningaasaqarnermut Nunamullu namminermut naalakkersuisoqarfik ippassaq unnukkut arfineq marlunut qiteqquttoq tusagassiorfinnut nalunaaruteqarpoq naalakkersuisoqarfiup pisortartaava "nammineq piumassutsiminik ingerlaannartumik atuutilersumik atorfimminit tunuartoq."
Carsten Frank Hansen Andelskassen Fynimi, Danske Andelskassers Bankimit pigineqartumi, 2006-imit juunimi 2012-imi soraarsitaanissami tungaanut immikkoortoqarfimmi pisortaavoq.
Aningaaseriviup pisortaanerata Jan Pedersenip Carsten Frank Hansenip soraarsitaasimanera ilumoornerarpaa.
Aningaaserivimmiilli taamaallaat soraarsitaasimanngilaq. Aningaaserivimmit juunimi 2012-imi soraarsitaanermi kingorna qaammatip tulliani Nuummi tunissutissanik pilerisaarutitalinnik suliffeqarfimmi Greentop Greenland ApS-imi pisortatut atorfittaarpoq.
Tassanili aamma atanera sivisungaangilaq. Carsten Frank Hansen aasaq tassanngaanniit aamma soraarsitaavoq.
- Soraarsitaanera uppernarsarsinnaavara. Maannakkorpiaq oqaaseqarfigeqqikkusunngilara, Ole Rud, suliffeqarfeeqqap siulersuisuinut siulittaasoq piginneqataasorlu oqarpoq.
Naalakkersuisoqarfimmi pisortanngorlaap aningaasanik peqquserluuteqarsimasutut unnerluutigineqarsimaneranik suliffeqarfinniillu marlunnit soraarsitaasimaneranik Berlingskep qulaajaanera, Namminersorlutik Oqartussani atorfilittat qullersaata Svend Hardenbergip aviisimit ippassaq paasissutissanik tunineqarnermini tupaallaatigisupilussuuaa.
Hardenberg Carsten Frank Hansenip atorfinitsinniarneqarnerani qitiusumik inissisimavoq, aningaasaqarnermut nunamullu namminermut naalakkersuisoqarfiup pisortassaanik atorfinitsitsiniarnermi ataatsimiititaliaq siulittaasuuffigigamiuk. Carsten Frank Hansenilli sulisitsisimasorisaanit oqaaseqaatinik piniarnissani puigorsimarpasippaa.
- Pisoq ilungersunartupilussuuvoq. Oqaatigisinnaavaralu paasissutissat saqqummiunneqartut uatsinnut nutaarluinnaammata tupaallannartupilussuullutillu. Pisoq maanna nammineerluta misissuiffigissavarput, Svend Hardenberg Berlingskemut ippassaq ualikkut oqarpoq.
Tamannalu Carsten Frank Hansenip Namminersorlutik Oqartussani atorfiit qullerpaat ilaannit nammineq piumassutsiminik tunuarneranik ippassaq kingusinnerusukkut kinguneqarpoq, tamannalu ulluni marluinnarni sulereernerani pivoq.