Naluttartut Nunatsinneersut Islandimi coronamit eqqugaasut

Nuummi Naluttartut peqatigiiffianneersut sapaatip akunnera kingulleq Reykjavikiliarput Reykjavik International Festival uani sapaatip akunnerata naanerani aallartittussaq peqataaffigiartorlugu.

Tassani nalaanneqarusunngivissoq nalaanneqarpoq.

- Naluttartut pingasut covid-19-mik napparsimalersimasut misissuinermi paasineqarpoq uangattaarlu aamma eqqugaasunut ilaallunga, Nuummi naluttartut peqatigiiffianni sungisaasoq Jonas Tetzchner Reykjavikimiit KNR-imut oqarpoq.

Naluttartut, angajoqqaat aqutsisullu tunillanneqarnissaq pinaveersimatinniarlugu iliuuseqarsimagaluaqaat. Meeqqat ukiortaap kingorna atuarfimmut orniguttaratik internettikkut atuarput pullartaasatullu ittumiipput Islandiliarnissamik tungaanut. Reykjavikimut tikinnermi kingorna aamma akuliunnaversaaqqissaarput.

- Naluttartut allat tunillatsissimanerannik malunnartoqanngilaq. Kisianni akornatsinneeqattaarnikuupput. Ilimanarsinnaavoq tunillatsissimanerat kingusinnerusukkut takussutissaqalersoq, Jonas Tetzchner oqaluttuarpoq.

- Nalilerparput pitsaanerussasoq meeqqat Nuummut angerlartinnissaat tunillatsissagaluarunik Reykjavikkimi mattusimasariaqalinnginniassammata, Jonas Tetzchner oqarpoq.

Taanna naluttartut Nunatsinneersut peqatigalugit akunnittarfimmi mattusimagallarfittut atuuttumi maanna inisseqqasoq oqarpoq.

Aarlerinartulik nalunngilaat

Islandimi malittarisassat maanna atuuttut tunngavigalugit tunillatsittut ulluni arfineq marlunni mattusimasussaatitaapput.

Angajoqqaat, naluttartut peqatigiiffiullu sinniisaasa ilisimareerpaat tunillatsittoqaratarsinnaasoq.

- Aallartigata periusissatsinnik aalajangersaanikuuvugut tunillatsittoqassappat malinneqartussamik tamannalu angajoqqaat ilisimaaraat. Meeqqat tamanna nalunngikkaluarlugu taamaattoq pakatsisimaqaat, Jonas Tetzchner oqarpoq.

Reykjavik International Gamesimi peqataasussat allassimaffiat saqqummiunneqarpoq tassanilu ilimanarsigaluarpoq piffissaq sivisooq atorlugu Nuummi naluttarfimmi piareersarsimaneq angusarissaarutaasinnaagaluartoq.

- Reykjavik International Gamesimi kalaallit peqataasalermatali aatsaat taama angusarissaartiginissaq ilimanaraluarpoq arlallit ujaminnannissamut ukioqatiminni periarfissaqaraluarmata, Jonas Tetzchner oqarpoq.

Nuummi naluttartut aasamut unammmiartorfiusinnaasumik misissuipput ukiup taamaasinerani tunillatsittut nunarpassuarni ikilingaatsiarsimasarmata.