Naluttarfiup siunissaa kommunip isumagisussanngorpaa
Kommunilli aningaasaliinissaa siunertanngitsoq, borgmesterip erseqqissarpaa.
- Peqatigiiffimmi nammineq kajumissutsitsinnik sulivugut, taavalu uani piginnaasagut inorsarfigisimavagut. Misissuisimavugut assigiinngitsunik aamma apersuisarsimavugut ikiortissarsiortarsimavugut driftsbudget aamma finansieringsplan eqqarsaatigalugit, kisianni alloriaqqinneq nalulersimavarput, Peqatigiiffik Naluttarfimmi siulittaasoq Ane Lone Bagger suliniutip Qaasuitsup kommunianut ippassaq tunniunneqareernerani taama oqarpoq.
Ilulissani naluttarfittaarnissamut, 64 millionit koruuninik naleqartussamut, aningaasalersuinissamut pilersaarut aamma ingerlatsinermi missingersuutit aningaasaateqarfinnut qinnuteqaqattaarnissami amigaatigineqarput, taakkualu kommunimi qanoq suliarineqassanersut maanna misissuataarneqassasut, borgmester Jess Svane oqarpoq, naluttaarfittaarnissamillu suliaq nalituujunerarpaa.
- Suliniutaasimasoq isumaqarpunga imartoorujussuusoq, tassami naluttarfik pitaariniaannarlugu pitaariniarneqanngilaq, kisianni tunuliaqutai assigiingitsorujussuupput, meeqqanut inuusuttunut pinaveersaartitsinermut allatigullu aamma ineriartornermut sammisuusoq takuneqarsinnaavoq, Borgmeter Jess Svane oqarpoq erseqqissarlugulu kommuni naluttarfimmut aningaasaliinissaa siunertaanngitsoq.
-Allaffissornikkut sutigut ikiorseeriarsinnaanerluta taanna misissuataassuarput, Jess Svane oqarpoq.
Qaasuitsup Kommunia naluttarfittaajoratarsinnaasup aningaasalersorneqarnissaanut pilersaarusioreerpat aamma ingerlatsinermi missingersuusioreerpat, peqatigiiffik aningaasaateqarfinnut qinnuteqarsinnaanngussaaq.
-Tassa ukua piginnaasaqarfiginngisagut, finansieringsplan aamma driftsbudget tigoreeriarutsigit, taanna qinnuteqarnissaq alloriaqqinnissami tullinnguutissooq, Ane Lone Bagger oqarpoq.
