Politikkikkut oqaaaseqartartoq Aki-Matilda Høegh Dam pillugu - Nalunaaruteqarneq ersarissoq
Folketing-ip oqaluttarfianit kalaallit oqaasii sarsualapput.
Folketing-imi ilaasortaq Aki-Mathilda Høegh Dam Siumumeersup tallimanngormat oqaluugiaatini danskisut oqaluugiaatigiumanngivippaa.
Innuttaasullu maani nunatsinniittut danskisut paasisinnaanngitsut oqalunnermi pineqarnertik pillugu malinnaasinnaannginnneri tunngavilersuutigalugu.
Siulittaasussatut sassarneq
Jenseeraq Poulsen: Ersarilluinnartumik oqariartuuteqarneq, politik-ikkut oqaaseqartartoq Jenseeraq Poulsen isumaqarpoq.
- Politikerip nammineerluni akisussaaffimminik kimeqassutsiminillu takutitsineratut isigaara, Jenseeraq Poulsen KNR-imut oqarpoq.
Taamatuttaaq iliuuuserisaata nalinginnaasumik tapersersorterisartagaaniinnanngitsoq aamma pitsaasumik sunniuteqarsimanissaa aamma isumaqarpoq.
- Tapersersortiminut sunniuteqarluinnarnera qularutiginngilara, aammali qinersisiginngisaminut, tamatumanimi naligiisitaanissaq pillugu Kalaallit Nunaanni eqeersimaartumik suliniuteqartut akornanni.
Siulittaasussamut sassarneq
Aki-Mathilda Høegh Dam-illu oqaluttarfimmit iliuuserisai sukumiisumik nalilersornerini Jenseeraq Poulsenip arlariinnik tunngavilersuutissaqarsoraa.
Siumumiillu politikerip siulittaasussatut inissinnissap periarfissaqalernera pineqaratarsinnaasoralugu.
- Aki-p oqalugiarnera assigiinngitsutigut qimerloorneqarsinnaavoq. Pissaaneqarneq pineqarsinnaavoq, naligiisitaaneq Siumumilu siulittaasunngorniuttoqangajalernera ilanngullugu.
Siumumi siulittaasussarsiornissaq juunip qaammataani Siumup nuna tamakkerlugu ataatsimeersuarnissaani oqallisigineqassaaq.
Siulittaasussarsiornissamilu Aki-Mathilda Høegh Dam nammineq ilanngulluni qinigassanngortittussat akornaniilernissani qinissaguniullu imminut soqutinarluartut inissittoq Jenseeraq Poulsen isumaqarpoq.
- Nalugaluarpara siulittaasussatut qinigassanngortissanersoq, taamaaliussagunili ersarilluinnarpoq partiimi nukittuutut inissisimanini avammut oqariartuutigigaa, Jenseeraq Poulsen oqarpoq, nangillunilu:
- Siulittaasussatullu qinigassanngortinnissi eqqarsaatigisimaguniuk ersarilluinnartumik avammut aamma politik-ikkut nukittuumik inissisimaffini pillugit oqariartuuteqarpoq
Toqqaannartumik nutserunneqartarnissaq oqallisigineqassaaq
Aki-Mathilda Høegh Damillu Folketing-imi Siulittaasoqarfimmut oqariartuutinilu maanna iluatsilertorpasippaa.
Folketing-imi Siulittaasoqarfiup tulliani ataatsimiinnissaani toqqaannartumik kalaallisuumit savalimmiormiusullu illuatungaanullu nutserisoqartalissanersoq oqallisigineqassaaq.
Tulliani ataatsimiinnissaq juunip 14-iani ingerlanneqassasoq, Folketing-imit Ritzauimut ilisimatitsissutigineqarpoq.