Nalunaarusiaq: Silap pissusia peqqutaalluni 200 millionillit allamut qimaassasut

Silap pissusiata allanngoriartornera maannangaaq iliuuseqarfigineqanngippat nunarsuarmi immat qaffakkaluttuinnassapput, imiinnarmik amigaateqartoqalissaaq, naatitanillu assigiinngitsunik tunisassiornerup eqqorneqarnerlunnera pissutaalluni inuit 216 millionit nunami iluini ukioq 2050-imi qimaasutut isigineqalissapput.

AAMMA ATUARUK Silap pissusia pillugu ataatsimiittartoqatigiit immat qaffassangatikkaat

Nunat tamalaat aningaaserivissuata nalunaarusiaa ippassaq ataasinngornermi saqqummersinneqartoq taama inerniliivoq.

Nunat pissakitsut silap pissusiata allanngoriartornerata kingunerisaanik eqqorneqarnerpaassapput.

Naliliinerit taakku 2018-imi naliliinernik nutarterinerupput, kisitsisit Europap kangisissuanut, Asiap qiterpasissuanut, Afrikap avannarpasinnerusortaanut Asiallu kangisinnerusortaanut tunngasut nutarterneqarlutik.

Sila ataatsimut isigalugu kiatsikkiartornerata malitsigisinnaasai matumani pineqarlutik.

AAMMA ATUARUK Ocean Vikingip inuit 130-it sinnillit Akullersuarmi annaakkai

- Silap pissusiata allanngoriartornerata malitsigisaanik qimaasut amerliartuinnassapput, nalunaarusiami allassimavoq.

Afrikami inoqajuitsumi Saharamit kujammut inuit 86 millionit nunami iluini qimaasuussapput Afrikallu avannarpasissuani 19 millioniussallutik.

Asiap kujasissuani inuit 40 millionit, silap pissusiata allannngoriartornerata malitsigisaanik qimaasutut inissisimalissasut eqqoriarneqarpoq, Asiap kangisissuani Manerassuarmilu inuit 49 millionit qimaasutut isigineqassallutik.

Immat qaffakkiartornerat, assersuutigalugu qaqorteqqasunik naatitsinerit eqqussavaat, soorlu aamma Asiap kujammut kangisissuani kuussuup Mekongip akuani aalisarneq eqqorneqarnerlussasoq, tamaani innuttaasut najukkaminnit qimagunnerannik kinguneqarnisssaa ilimagineqarluni.