Mittarfiliornerit: Nalorninartorsiorneq malugaarput

Mittarfiliortiternissat maanna mittarfinnut pioreersunut nalornilersitsipput. Timmisartorsuarnut mittarfiuinnassappat? Mittarfittut naliginnaasutut atulissappat imaluunniit qulimiguulinnut mittarfinngussanerpat?

Narsarsuarmi Kangerlussuarmilu mittarfiit qanoq pineqarnissaat suli aalajangerneqanngikkaluartoq najugaqartunut sunniutereersimavoq.

- Iluamik tigussaasumik siunniussaqannginnerup sivisujaamik malugiartorparput sunniutigiartorai kingaatsumik inuerukkiartuaalaarneq. Taannalu aarlerinartumik isumaqarfigivarput, Narsarsuami nunaqarfimmi aqutsisut siulittaasuat Mourits Karlsen oqarpoq.

AAMMA ATUARUK Mittarfissuaqalerpat nunaqarfiit inuerutiimissasut

Mittarfiliornerit inuiaqatigiinnut aningaasatigut qanoq kinguneqarnissaat pillugu misissueqqissaarnermi Kangerlussuup Narsarsuullu mittarfii qulimiguulinnut mittarfinngorlugit naatsorsuisoqarpoq.

Taakkulu qulimiguulinnut mittarfiulissappata suliffissat amerlajunnaarpata suliffissaaleqisut illoqarfinnut allanut nuunnerinik kinguneqartussaassaaq.

Kangerlussuami mittarfiup nunatta iluani angalasunut mittarfinngussappat 500 millionit koruuninik naleqassasoq misissueqqissaarnerup takutippaa. Qinersinngitsiarnermilu Kim Kielsenip oqaatigaa, Kangerlussuaq nunap iluani angalasunut mittarfiunissaa Siumumit tapersersorneqartoq.

AAMMA ATUARUK Kim Kielsenip Kangerlussuaq heliportinngortikkusunngikkaa

Kangerlussuarmili Narsarsuami nalorninertullu nalornisoqarpoq.

- Marluk matulerput ajoraluartumik. Aappaa naluara qaqugorpiaq, ullulerneqanngilaq, Kangerlussuarmi nunaqarfimmi aqutsisut siulittaasuat Laila K. Thomassen oqarpoq.

Siumut eqqaassanngikkaani partiit sinnerisa mittarfiit pillugit qanoq isumaqarnerlutik erseqqissumik oqaatiginngilaat.