Kim Kielsenip Kangerlussuaq heliportinngortikkusunngikkaa
Nuummi Ilulissanilu mittarfissualiornerit inuiaqatigiinnut 1,3 milliardit koruuninik ukiut 25-t ingerlanerini sipaaruteqartitsissasut, misissueqqissaarnermi, Naalakkersuisut suliakkiissutigisaanni, atuarneqarsinnaavoq.
Taama sipaaruteqarnissaq, Kim Kielsenip qinersisussanik qallunaatut arfininngormat ataatsimiisitsinermi oqaatigaa.
- Inuiaqatigiit 1,3 milliardit koruuninik sipaaruteqarnissaat pitsaasuusoq oqarusuppunga, Kim Kielsen arfininngormat oqarpoq.
AAMMA ATUARUK Mittarfissuaqalerpat nunaqarfiit inuerutiimissasut
Misissueqqissaarinerli naapertorlugu Kangerlussuarmi Narsarsuarmilu mittarfissuit aatsaat heliportinngortinneqarpata inuiaqatigiit taama sipaaruteqassapput. Taamaattoqarpallu nunaqarfinni taakkunani marlunni najugallit ikilissaqaat, suliffiit ikilissammata.
Nunaqarfiilli inuerussarneqarnissaat Siumup kissaatiginngikkaa Kim Kielsen oqarpoq.
- Kangerlussuup heliportiinnartut inissinneqarnissaa, Siumumit kissaatiginngilarput, Kim Kielsen ullumi oqarpoq.
Kangerlussuaq 1500 meterinngorlugu nunatta iluani angalasunut mittarfinngussappat, milliardip affaanik akeqassasoq, misissueqqissaarnermi naatsorsorneqarpoq. Taamaalippallu mittarfiliornikkut inuiaqatigiinnut sipaarutissat tamakkiisut ikinnerussapput.
AAMMA ATUARUK Siumup isumani aaliangiusimavaa
Kangerlussuarmili mittarfeqaatigaluni sipaaruteqartoqarsinnaasoq, Kim Kielsen isumaqarpoq.
- Assiliaq ajornerpaaffiatut isikkoqartillugu kisitsisit taakku saqqummiunneqarnikuupput. Taamaammat suliat taakku mianersorujussuarluni ingerlanneqarnikuupput. Taamaammat allatut isikkoqalernissaa naatsorsuutigisinnaavarput, Siumup siulittaasua, Kim Kielsen oqarpoq.
Inuit Ataqatigiit siulittaasuata, Sara Olsvigip, misissueqqissaarnerni inerniliussat isummerfigerusunngilai.
KNR-imulli mailikkut ima allappoq:
- Paasissutissat tamarmik Inatsisartunit Naalakkersuisuniillu oqallisigineqarsinnaanngorlugit kalaallisut danskisullu saqqummiunneqarpata, isummerfigerusuttorujussuuvakka. Una nalunaarusiaq, paasissutissarpassuit, akisussaassusilimmik aalajangiisinnaanissatsinnut atorfissaqartitatta, ilagiinnarpaat.
AAMMA ATUARUK Mittarfiliortiternerit nutaat milliard koruuninik sipaaruteqarfiussasut missueqqissaarnermi inerniliunneqarpoq
