Timmisartoqarfiit: Siumup isumani aaliangiusimavaa
Naak akunnerminni sammisaq assortuussutaagaluartoq Partii Naleqqameersullu isornartorsiuigaluaqisut, Siumut kisimiilluni aaliangiisinnaasuuguni timmisatoqarfiliortitsinissat 3,6 milliardtinik nalillit aallartiinnarsinnaagaluarput, tamannalu partiit sinnerisa isuma akuersaaraat malunnarpoq.
Timmisartoqarfiit mittarfiillu qineqqusaarnermi initoqaat. Partii Naleraq siunniussamut akerliuvoq Siumukkormiullu isuma akunnerminni assortuussutigalugu. Mittarfiliortitsinissalli pilersaarutaareersutut ingerlalereersut matumani kalluarneqassagunaratik.
AAMMA ATUARUK Mittarfiliortiternerit nutaat milliard koruuninik sipaaruteqarfiussasut missueqqissaarnermi inerniliunneqarpoq
Nunatsinni timmisartoqarfiliortitsinissanut tunngatillugu isumartik allanngortissimanngikkitsik tallimanngormat Siumup tusagassiutinut nalunaarusiaanni naqissuserpaat. Qinersisartut akornanni Siumup isummersuutaa nalornissutigisaleraallu Siumukkormiut taamaasiorput.
Kangerlussuup timmisartoqarfiata sumiiffimmi timmisartoqarfeeqqatut atorneqaannalernissaanik pilersaarutit Qeqqata Kommuniani Siumut sinnerlugu qineqqusaartut ilaasa isornartoqartittaleraallu partii taama qisuariarpoq.
Kangerlussuup atlantiku ikaarlugu timmisartunut mittarfittut atorneqaannarnissaa, Sisimiut Kangerlussuullu akornanni aqqusinniortoqarnissaa Qeqqata Kommuniani borgmesteriusimasup Hermann Berthelsenip ilaatigut qineqqusaarutigai.
AAMMA ATUARUK Mittarfiliortiternerit pillugit misissueqqissaarineq nutaaq saqqummiunneqartoq
Borgmesteriusimasulli partiiata isumaa naapertorlugu Kangerlussuup nunanut allanut timmisartuussinermi qitiusutut inissisimanera uneriaannaavoq.
- Atlantiku ikaarlugu mittarfivut marluusut ukiut 60-it missaani atoreerpavut nunattalu ineriartorneranut allanngueqataasimanatik. Taamaammat kommuunit allaanerusumik oqaloqatigisariaqassavagut kommuunit marluk mittarfeqarfillit siunissami inerisarneqarnissaanut periarfissarisinnaasaat naniniassagatsigit, Jess Svane tusagassiutinut nalunaarummi ilaatigut taama allaaserisaqarpoq.
Nunatsinni angallannermi attaviit nutaanngorsarneqarnissaat partiit tamarmiusut - Per Rosing Petersen Partii Naleqqameersoq minillugu - 2015-imi akuersissutigaat. Qaammalli kingulleq Hans Enoksen Sermitsiami saqqummiusseratarpoq inuiaqatigiillu nutaanngorsaanissamut ilumut akissaqarnersut apeqquserlugu. Tamatuma saniatigut aningaasatigut kingunissaasinnaasut naatsorsuutit ujartorlugit.
AAMMA ATUARUK Mittarfeqarfiit er udelukket fra nye lufthavne
Partiilli sinnerisa timmisartoqarfiliortitsinissamut pilersaarutit ingerlaannarnissaat siunniuteqqaannaritsik qineqqusaarnermi malunnarpoq.
Tallimanngormallu qinersisartut isumasiorneqarnerat isigissagutsigu taava timmisartoqarfiliortitsinissamut pilersaarutit ingerlareersut partiit amerlanersaannit - tassaasut Siumut, Inuit Ataqatigiit, Demokraatillu, tassa 80 procentinit taaguunneqartussanit - tapersersersorneqarput.
