Nakorsiarnissamik SMS-ikkut eqqaasitsinerit takkuttartut amerlanerulersissagaat
SMS-imik atuinissaq nunatsinni nakorsiartarfiit isumatsialaasoraat, kigutileriffinniilli atorneqarnera maannamut iluatsippallaanngilaq.
- Takkutinngitsoortartut ikilinerinik qularnanngitsumik kinguneqarpoq, takkutinngitsoortartulli suli amerlavallaarput, kigutilerisut qullersaat Lone Mahnfeldt taama oqarpoq.
Kigutileriffimmut takkutinngitsoortartut qaammammut qassiusarnerusut maannakkorpiaq erseqqissumik kisitsisaatigineqanngilaq. Lone Mahnfeldtili naapertorlugu ajornartorsiut annertuvoq, sulisut suliassaminnut piffissamik sapinngisamik annertupaamik atuinissaannik ajornakusoortitsisarmat.
AAMMA ATUARUK Nakorsiarnissamut piffissaliussaq puigorneqartartoq
- Ulloq suliffiusoq pilersaarusioreertarparput, aamma nakorsiartussat najoqqutaralugit sulisut suliassaat pilersaarusiugaasarput. Takkutinngitsoortoqartillugu ullormut pilersaarutit atorsinnaajunnaartarput.
Tamannalu sivisunerusumik utaqqisoqartarneranik kinguneqartarpoq. Takkuttussammi tamakkerlutik takkutinnginnerisigut misissugassat tamakkerneqarsinnaasanngillat.
- Tamanna ajornartorsiutaavoq, aamma sullitatsinnut erseqqissassallugu pingaarpoq imminnut allanullu kigutit nakorsaannukarusuttunut ajornartorsiummik pilersitsisarmat, Lone Mahnfeldt oqarpoq.
Ajornartorsiut erseqqissaassutiginiaraat
SMS-it nakorsiartussanut eqqaasitsissutitut atorneqarnerisa saniatigut, takkutinngitsoortartut qassiuneri malinnaaffigineqarsinnaanngorlugu skålimut igalaaminermut nakkartitsisoqartarpoq.
Skåli tamanit takuneqarsinnaasumiitinneqarpoq ajornartorsiutaasoq takutikkumallugu. Takkutinngitsoortoqartillugulu kigutaasiveeqqamik tassunga nakkartitsisoqartarpoq.
- Qaammatit tamaasa imaarneqartarpoq. Maajimilu sapaatit akunnerisa kingullersaanni takuneqarsinnaavoq ulikkaaveqqasoq, kigutilerisut qullersaat Lone Mahnfeldt oqarpoq.
