Nakorsaq: Naamik, Nuummi coronamik tunillatsinnikuusimasut misissoqqissanngilagut
Savalimmiuni inuit arfineq pingasut, coronavirusimik tunillanneqareersimasut, coronaviruseqartut paasineqarpoq.
Nuummi inuit aqqanillit coronavirusimik tunillatsinnikuusimapput, tamarmilli maanna peqqisseqqinnikuullutik. Savalimmiunili pisoq pissutigalugu taakku aqqanillit nutaamik misissorteqqinnissaat Nakorsaaneqarfiup innersuussutiginianngilaa.
AAMMA ATUARUK Savalimmiut: Coronamik tunillatsinnikuusimasut napparsimaleqqittut
Nakorsaaneqarfimmit, Paneeraq Noahsen taama oqarpoq.
- Savalimmiuni nakorsaanerup virusip sinnikuinik nassaartoqarsimanerarpaa. Tassa imaappoq nutaamik tunillatsissimanngillat imaluunniit suli tunillaassuisinnaanngillat, Paneeraq Noahsen oqarpoq.
Peqqissivinngitsut
Savalimmiuni nakorsaanerup, Lars Fodgaard Møllerip oqarnera naapertorlugu coronamik tunillatsissimasut arfineq-pingasut virusi aallaqqaammut napparsimatitsilersimasoq suli pigigunarpaat.
- Isumaqarpugut peqqissisimassanngitsut. Virusimik imaluunniit virusimik toqungasumik timaanniittoqarsimavoq, Savalimmiuni nakorsaaneq P1 Morgenimut oqarpoq.
Taamaammallu Nuummiittut aqqanillit misissorneqaqqinnissaat pisariaqanngilaq.
- Naamik misissorneqaqqinnissaanut pissutissaqanngilaq, taakkulu tunillaaqqissinnaasorilerneqanngillat, Paneeraq Noahsen oqarpoq.
AAMMA ATUARUK Savalimmiuni tusagassiortoq corona pillugu: Inuit paatsuungapput
- Peqqissereernikuusimasut piffissap ingerlanerani tunillaaleqqissinnaaneranut ilisimatuussutsikkut uppernarsaatissaqanngilaq. Tamatumunnga takussutissaqanngilaq, taamaammat misissoqqittalernissaanut pissutissaqanngilaq, nakorsaaneqarfimmit nakorsaq oqarpoq.
Nunatsinni tunillatsissimasumik nutaamik apriilip ulluisa sisamaannili nassaartoqaqqinngilaq.
Savalimmiuni coronamik tunillatsissimasut 187-iupput.