Savalimmiut: Coronamik tunillatsinnikuusimasut napparsimaleqqittut
Savalimmiuni inuit arfineq pingasut coronavirusimik tunillatsinnikuusimasut, virusimik nassaarfineqaqqissimapput.
Savalimmiuni nakorsaaneq, Lars Fodgaard P1 Morgenimut taama oqarpoq.
Taassumali inuit arfineq-pingasut nutaanik aattortissimanissaat ilimaginngilluinnarpaa. Taakku virusimik napparsimassutigisimasaminnik suli peqarsimassasorai.
AAMMA ATUARUK Savalimmiuni tunillatsittut amerliartunnginnerusut: Ungasillisimaallaqqippugut
- Isumaqarpugut peqqissisimassanngitsut. Virusimik imaluunniit virusimik toqungasumik timaanniittoqarsimavoq, nakorsaaneq oqarpoq.
- Tunillatsissimasunit arfineq-pingasunit ataaseq minillugu sivikitsumik napparsimariarlutik peqqisseqqinnikuupput.
Tupaallaatigilaaraat
Tunillatsissimasut arfineq-pingasut nammineq nakorsaminneereerlutik tunillatsissimasutut uppernarsarneqaqqipput. Tamanna coronamik misissorneqarnerisa viruseqarunnaartutut nalunaarutigineqarneranit sapaatit-akunneri sisamat arfinillillu qaangiunnerani pivoq.
- Siullermik misissorneqarneranit tunillatsissimasutut paasineqaqqinnissaanut piffissaq taama sivisutigisoq ingerlareernera tupigusuutigilaarparput, Lars Fodgaard Møller oqarpoq.
- Savalimmiuni tuniluuttoqannginnera qulakkiivingajaqqavarput. Tunillatsissimasut tamarmik kikkuuneri kimiillu tunillanneqarsimaneri nalunngilagut. Ilisimaneqanngitsunik tunillatsissimasoqanngilaq. Taamaammat allanit tunillatsissimannginnissaat qulakkeerlugu oqaatigisinnaavarput.
AAMMA ATUARUK Savalimmiuni tusagassiortoq: Pisut quarsaarutigaavut
Savalimmiuni inuit katillugit 187-it tunillatsinnikuupput. Nakorsaanerup oqarnera naapertorlugu taakkunannga qulingiluaannaat kimit tunillanneqarsimanerat ilisimaneqanngilaq.
Savalimmiut nunarsuarmi kisiartaalluni napparsimasimasut napparsimaleqqissimaneranit paasisaqarfiunngilaq.
Korea Kujallermi inuit 179-it aappassaaneerlutik tunillatsissimasut Ritzau-ip apriilip ulluisa 19-ianni allaaseraa.