Savalimmiuni tusagassiortoq: Pisut quarsaarutigaavut
Coronavirusi Savalimmiuni 52.000-t sinnilaaginnarlugit inulimmi tuniluutilertorpoq, Tunillatsissimasut Utvarp Færøya naapertorlugu 118-iupput.
Taamaattumik nikallungavugut, Savalimmiuni radioqarfimmi tv-qarfimmilu, Kringvarp Føroyami aaqqissuisoq tusagassiortorlu Uni Leitisstein Hansen oqaluttuarpoq.
- Isumaaloqaalutalu pisut nalaatavut pillugit ernumavugut. Utoqqartavut, sanngiitsortavut anigorsinnaanngisamillu nappaatilittavut amerlapput. Taakkua coronavirusimik eqqugaassappata nunatsinnut kinguneqapilussinnaavoq, taanna oqarpoq.
Marloriaatinngorsimanerat quarsaarnartoq
Coronavirusimik tunillanneqarsimasut Savalimmiuni marloriaat sinnersimaleraat tassa 18-iniit 47-nngorsimasut marlunngornermi nalunaarutigineqarpoq, tamannalu annilaarnartoq, Uni Leitisstein Hansen oqarpoq.
1. San Marino
2. Savalimmiut
3. Island
4. Andorra
5. Luxembourg
6. Vatikani
7. Italia
8. Liechtenstein
9. Schweiz
10. Spania
20. Danmark
42. Kalaallit Nunaat
Tunillanneqarsimasutut nalunaarsukkat allattorsimaffiat una tunillanneqarsimasutut nalunaarsukkat pillugit paasissutissat 2020-imi marsip ulluisa 22-ianneersut tunngavigalugit suliaavoq.
Tunillanneqarsimasorineqartunik misissuinermi nunat assigiinngitsut assigiinngitsunik periuseqarnerat eqqumaffigeqqunarpoq. Tassami nunat ilaanni tunillanneqarsimasut nalunaarsukkanit amerlanerorataannaapput.
Paasissutissanik pissarsiffiit: CSSE, Johns Hopkins University (WHO, CDC, ECDC, NHC, DXY nunanilu ataasiakkaani nutaarsiassaqartitsiviit), Naalagaaffiit Peqatigiit aningaasaqarnermut inooqatigiinnermullu immikkoortortaqarfiat.
Paasissutissat KNR-imit suliarineqarput.
- Tuniluutilertornera qularnanngitsumik tupaallaatigerrapparput. Nunaqqatigiiulluta ataqatigiilluarlutalu ersoqatigiilluartuuvugut, marloriaatinngornissaalli ilimagisimanngilarput, Uni Leitisstein Hansen oqarpoq.
Savalimmiuni tunillanneqarsimasut akornanni ataaseq napparsimmavimmut unitsinneqarpoq, tamarmillu angerlarsimaffimminnit aneqqusaanngikkallarput. Oqartussaasulli ilungersortorujussuanngortut, aaqqissuisoq oqaluttuarpoq.
Tamanna ilaatigut inuit ullormut 200-t missaat peqqinnissaqarfimmit misissugassamik tigusiffigineqartarnerannik pissuteqarpoq, taamaaliornerlu amerlasuut sulisariaqarnerannik kinguneqarpoq. Tamannalu ilutigalugu tunillanneqarsimasutut paasineqartut amerliartortuarsinnarput, inuillu taakkua attavigisimasaannik ujarlerneq piffissamik aamma atuiffioqaaq.
Pisut ilungersunartuusut paasigaat
Savalimmiuni matuneqarallartorpaaloqarpoq, soorlu Danmarkimi nunatsinnilu aamma taamaaliortoqartoq. Soorlu Kringvarp Føroyap radioqarfiani tunillanneqarsimanngitsunik sulisoqaannaaveqqullugu, sulisut affaakkaaginnarlutik sulipput. Nunaminnilu pisut ilungersunarluinnartuusut maanna paasigaat, Uni Leitisstein Hansen oqarpoq.
AAMMA ATUARUK Ministeriuneq nunatsinnut: Iluaqutaasinnaasut tamaasa atulersigit
- Savalimmiuni innuttaasut angerlarsimaannaqqusaapput. Unittooqqagallarpugut. Suut tamarmik matoqqapput, imerniartarfiit sutorniartarfiillu.
- Nunarput sapaatit akunnerata naanerani nuannisaarfiuvoq, eqqugaarujussuarnerpulli paasiartulerparput. (...) Maani Torshavinimi kisermaajusutut misigisimanarsinnaavoq. Inuiaqatigiit killilersuinernit eqqugaaqaat, angerlarsimaannaqqusaanertillu imminnullu qanillattunnginnissartik paasivaat, taanna oqarpoq.
Ikiuukkusuttut imaaginnavittut
Savalimmiunili innuttaasut ernumaannaratik isumannaatsuunissartillu eqqarsaatigalugu imminnut qanillattornaveersaaginnaratik ajornartoornerup ilutigisaanik ataqatigiilluarnertik ikiuukkumatussusertillu aamma takutippaat.
- Inuit ikiuukkusussuseqartut ersareqaaq. Ikiuukkusuttut imaaginnavipput. Soorlu angerlarsimaannaqqusaasunut niuerniuunneqarnissamik pisariaqartitsisunut. Napparsimmavinnilu soorlu eqqiaaqataallutik ikiuukkusuttut aamma imaaginnavipput.
- Ataqatigiilluartuni ersoqatigiilluartunilu innuttaasooqataasutut misigisimanaqaaq. Nuannersorpassuit erserarput, Uni Leitisstein Hansen oqarpoq.
Tunillanneqarsimasut: 118
Misissugassamik tigusiffigineqartut: 2255
Ajorunnaartut (tunillanneqarsimareerlutik): 23
Kalaallit Nunaat
Tunillanneqarsimasut: 4
Misissugassamik tigusiffigineqartut: 194
Paasissutissanik pissarsiffik: corona.fo, nun.gl (marsip 23-ianni 2020)
Facebookimi attaveqatigiiffissarpaalunnik pilersitsisoqarsimasoq, taassuma nassuiarpaa, Savalimmiunilu innuttaasut kikkulluunniit ikiuukkusuttut ikiorneqarusuttulluunniit taakkununnga ilanngussinnaapput.
Iliuuseqalertorsimannginneraasut
Ataatsimut isigalugu savalimmiormiut oqartussaasut innersuussutaannik sapinngisamik malinnipput. Oqartussaasulli iliuuseqarnertik pillugu aamma isornartorsiorneqarput. Killilersuilerneq kingusinaarnerarlugu Kingusinaarlutik killilersuisimaneragaallutillu matooraalersimaneraagaapput, Uni Leitisstein Hansen nassuiaavoq.
- Savalimmiormiorpassuit pisortat iliuuseqalertinnagit, Savalimmiut Atlantikup avannaani avinngarusimallutik inisissisimanerat atorluarlugu, timmisartuussinernik umiarsuarnillu angallassinernik unitsitsisinissaat ujartorpaat.
AAMMA ATUARUK Coronavirusip ernumassutigineqarnera: Atuarfiit timmisartuussinerillu matulersut
- Avinngarusimanerput nalinginnaasumik akornutigisartagarput iluaqutaaleriasaarpoq. Taamaattumik nappaammik siaruatsaaliuipallanniarnermi tamatuminnga atorluaasimannginneq isornartorsiorneqarpoq.
Isornatorsiuisut savalimmiormiunut immikkut iliuuseqarnissamik ujartuisut
Savalimmiormiorpaat ujartugaat Kim Kielsenip nunatsinni piviusunngortippaa. Naalakkersuisut aalajangerput, nunatsinni aamma nunatsinnut nunatsinniillu timmisartuussinerit tallimanngorpamiit ulluni 14-ini unitsikkallassasut.
Savalimmiuni oqartussaasut Danmarkimi naalakkersuisut innersuussutaannik maleruutiinnarnertik pillugu aamma isornartorsiorneqarput. Savalimmiormiut ersoqatigiilluarlutillu ataqatigiittorujussuupput. Taamaammat Savalimmiuni pissutsit aallaavigalugit immikkut iliuuseqarsimannginnerminnik pilersaarusiorsimannginnerminnillu isornartorsiorneqartut, Uni Leitisstein Hansen nassuiaavoq.
Uni Leitisstein Hansenip oqarnera naapertorlugu Savalimmiuni peqqissutsimut ministerip qisuariarnera immaqa isumatusaarsimannginnermik iliuuseqalertorsimannginnermillu nassuerneruvoq.
