Savalimmiuni tusagassiortoq corona pillugu: Inuit paatsuungapput
- Inuit paatsuungapput. Nappaammut tunillanneqarsinnaajunnaartarneq inuit qularilerpaat, Kringvarp Føroyami aaqqissuisoq tusagassiortorlu Uni Leitisstein Hansen oqarpoq.
Savalimmiuni coronavirusimik tunillatsinnikuusimasut arfineq pingasut napparsimaleqqissimasut sapaatip-akunnerata naanerani nalunaarutigineqarpoq.
Savalimmiuni nakorsaanerup inuit arfineq-pingasut nutaanik aattortissimanissaat ilimaginngilluinnarpaa. Nappaat timaanniiginnarsimassasoq, taassuma qularinngilaa.
AAMMA ATUARUK Savalimmiut: Coronamik tunillatsinnikuusimasut napparsimaleqqittut
Savalimmiuni nakorsat tupigusupput pisorlu misissuleruttoraat, Uni Leitisstein Hansen oqarpoq.
- Inuit nappaammik tunillanneqaqqissimanersut nappaalluunniit timaanniiginnarsimanersoq ilisimaneqanngilaq, taanna oqarpoq.
Toqquteqartoqarnikuunngilaq
Savalimmiuni tunillanneqarsimasoq siulleq marsip aallartilaarnerani paasineqarpoq. Savalimmiuni tunillanneqarsimasut katillutik 180-iupput, taakkunanilu toqquteqartoqarnani.
Maannakkulli arfineq pingasut napparsimaleqqipput. Tamanna Savalimmiormiunit ernummatigineqartoq, tusagassiortoq oqarpoq.
- Soorunami inuit ernumapput. Mittarfiit matuneqarnissaat suli oqallisaaqaaq Savalimmiunullu tikittut angerlarsimaqqaartarnissaat oqartussanit piumasaqaatinngortariaqartoq oqallisigineqartunut aamma ilaavoq.
- Susoqassanersoq piffissap takutikkumaarpaa
Angallanneq kisiat innuttaasunit oqallisigineqanngilaq. Timersornikkut pisut ammaqqikkiartulernerat aamma puigorneqanngilaq. Ukioq isikkanik arsaaffik maajip qulingiluaani aallarteqqissaaq. Tamannalu oqallisaangaatsiartoq, Uni Leitisstein Hansen oqarpoq.
Tassami Savalimmiuni, nunat allat assigalugit, ulluinnaat uteqqikkiartulerput.
- Angerlarsimaannartarneq oqartussanit suli piumasaqaatinngunngilaq. Aamma tamanna suli kissaatigineqanngilaq.
- Susoqassanersoq piffissap takutikkumaarpaa. Nualluut uteqqinnersoq imaluunniit ammaqqikkiartorneq ingerlaannassanersoq.