Nakorsaasiorfissuaq akiliisinnaajunnaartoq
Amerikami nakorsaasiorfissuaq Purdue Pharma USA-mi inuppassuit nakorsaatinik morfinimik akulinnik pinngitsuuisinnaajunnaarsimanerannut sunniuteqaqataasimasutut unnerluutigineqartoq akiliisinnaajunnaarnerarluni nalunaarpoq.
Nutaarsiassaqartitsivik Reuters taama allappoq.
Purdue Pharma USA-mi naalagaaffeqatigiit immikkoortuisa ilarpassui - nakorsaasiorfissuup nakorsaatinut morfinimik akulinnut akileraarusiisimanera pillugu eqqartuussivimmut suliassanngortitsimasut - peqatigalguit atuukkallartussamik isumaqatigiissuteqareerneranit ullualuit qaangiummata akiliisinnaajunnaarnerarluni nalunaarpoq.
USA-mi illoqarfiit, naalagaaffeqatigiit immikkoortui, pisortaqarfiit 2000-nit amerlanerusut nunallu immikkoortui 20-nit amerlanerusut katillugit 12 milliardut dollarsinik Purdue Pharmamit taarsiivigitittussanngorput.
Nipaallisaatit OxyContinit inuppassuit nakorsaatinik morfinimik akulinnik pinngitsuuisinnaajunnaarsimanerannut pissutaanerpaasut ilaattut oqaatigineqartartut Purdue Pharmamit milliarderpaalunnik iluanaaruteqarfiusimapput.
AAMMA ATUARUK Medicinalgiganten idømt en milliardbøde
Nakorsaatit morfinimik akullit nipaallisaataapput sakkortuut, taakkulu pinngitsuugassaajunnaartartunik akoqarput.
Purdue Pharma USA-mi inuppassuit nakorsaatinik morfinimik akulinnik pinngitsuuisinnaajunnaarsimanerannut sunniuteqaqataasimasutut unnerluutigineqarpoq. Nakorsaatit taakku nakorsaatissanut allagartamik peqqaarluni pisassaasut pinngitsoorneqarsinnaajunnaarsinnaanerannik Purdue Pharmamit paasissutissartaqartinneqaratik niuerutigineqapiloorsimapput.
USA-mi Nappaatinik Nakkutilliinermut Pitsaaliuinermullu Sullissiviup paasissutissiinera naapertorlugu inuit nakorsaatinik morfinimik akulinnik pinngitsuuisinnaajunnaarsimanertik pissutigalugu 1999-imiit 2007-imut toqusut 400.000-ngajaapput.
USA-mi nunap immikkoortuisa ilaanni Ohiomi illoqarfimmi Akronimi inuit nakorsaatinik morfinimik akulinnik pinngitsuuisinnaajunnaarsimasut 2016-imi amerlanerpaaffimminniimmata inunnik taakkuninnga nakorsaatitorpallaarsimasunik naammattuuiffiujuartarsimavoq, Akronimilu nakorsaq toqungasut timaannik misissuisartoq lastbiilinik nillusaavilinnik toqungasut timaannik angallassisartunik aggersaasariaqartarsimavoq.
Berlingskep ukioq manna maajimi allaaserisaa naapertorlugu Danmarkimi OxyContininik nakorsaatitortartut aamma amerligaluttuinnarput.
Region Hovedstadenip ilisimatitsissutaani allassimvoq, OxyContinit - sakkortuumik pinngitsuugassaajunnaaratarsinnaasutut nalilerneqartaraluartut - taakkuninnga nakorsaatitortartut amerlangaatsiarlutillu napparsimmavinni uninngasunut Region Hovedstadimilu nakorsanut namminerisamik nakorsaaffeqartunut tunniunneqartartut, Berlingske allappoq.
Morfinimik akulinnik nunatsinni aamma nakorsaatitortoqartartoq nunatta Peqqinnissaqarfianit nalunaarutigineqareernikuuvoq.
Nunatsinni ingammik pilatsittussat kræftertullu morfinimik akulinnik nakorsaatitortinneqartarput
