Nakorsaatiliorfissuaq milliadikkaanik akiligassinneqartoq
![](/sites/default/files/styles/image_934x467/public/article_images/usa_flag_0.jpg?itok=AYMfBBv-)
Nakorsaatiliorfissuup Johnson & Johnsonip napparsimasunut nakorsaatinik sakkortuallaarujussuartunik pinngitsuuisitsisinnaajunnaarsitsisimanera pissutigalugu 3,8 milliardit koruuninik akiligassinneqarpoq.
Nakorsaatiliorfissuup Johnson & Johnsonip nipaallisaatit opioiderinik taaguuteqartut pinngitsuuisinnaajunnaarsitsisartut ukiorpassuarni ilisimagaluarlugu peqqusersusaarsimanini pissutigalugu eqqartuunneqarpoq.
Johnson & Johnsonip amerikamiut tuusintilippassuit pinngitsuuisinnaajunnaarsissimagai, Oklahomami eqqartuussisup erseqqissaatigaa.
Suliffeqarfiullu nakorsat napparsimasullu nakorsaat ulorianannginnerarlugu, aamma napparsimasut pillugit suliniaqatigiiffinnit pisortatigiinngitsunillu suliniuteqarniartunit innersuussutaanerarlugu peqqusersusaarfigisimavai.
- Suliffeqarfik Johnson & Johnson milliardilinnik kaaviiaartitaqartoq piumatunermik inuillu anniaataannik naalliuutaannillu iluatissarnermik aallaaveqartoq uppernarsivarput, Oklahomami naalagaaffiup unnerluussisussaatitaasua eqqartuussummik unnuaq nalunaarutiginninnermi oqarpoq.
Ataasinngornermi milliardinik akiligassiineq opioiderinik nakorsaasiortartut, nassiussuisartut, tuniniaasartullu pillugit eqqartuussivimmut suliassanngortitsinernit 2000-init amerlanerusunit siulliuvoq.
Opioderimik akoqartut Nunatsinni aamma atugaasut
Nunatsinni Peqqinnissaqarfiup nakorsaatit opioiderimik akoqartut aamma atugarai.
Tamanna nakorsaanerup, Berit Bjerre Handbergip KNR-imut ilisimatitsissutigaa, ilanngullugu oqarluni:
- Peqqinnissaqarfik tassunga tunngatillugu malinnaaqqissaarpoq. USA-mimi eqqartuussivimmi suliaq pingaartumik Danmarkimi malittarisassanik suleriaasermillu naleqqussaanermik kinguneqassappat naliliiffigineqassaaq kalaallinullu naleqqussarneqarluni. Nunatsinni nakorsaatit opioideritallit pingaartumik pilattaalluni suliaqarnermi kræftimillu nappaatilinnut nakorsaatitortitsinermi atorneqartarput, Nunatsinni nakorsaaneq, Berit Bjerre Handberg oqarpoq.