VIDEO Nakorsaaneq: Nunatsinni pissutsit taamaapput
Pisoq Nukappiaqqap, Jogvanip, arnaata killitsinnareqigaa Qanoruup ilanngutassiaani takuneqarsinnaavoq.
Ilaqutariit artorsarsimaqinerat nakorsaanerup, Knud Erik Kleistip, paasilluarsinnaavai. Taamaattorli utaqqisitsinissamik aaliangerneq pissusissamisoortuusoq oqarluni.
- Ingerlaannaq aggersimasuuguni pilatsillunilu immaqa ippigisaqannginnerussagaluarpoq, Knud Erik Kleist KNR-imut oqarpoq.
Aamma atuaruk Anaanaasup ikioqqunera killitsinnartoq
Nakorsaanerup erseqqissarpaa sapaatip akunneranik utaqqisimagaluaruni suliaritinnerata inernera allaanerunavianngikkaluartoq.
Taamaattorli ilaqutariit tujormisimaqisut paasisinnaalluarpai.
- Paasilluarsinnaavakka. Kisiat tassa Nunatsinni pissutsit taamaapput, Knud Erik Kleist naqissusiivoq.
Facebookimi uissuummisut
Jógvanip arnaata pisoq facebookimini allaaserimmagu facebookimik atuisartut ilaasa uissuummillutillu kamassimaqisut takuneqarsinnaapput. Allaaserisarlu 1700-nit ikinnerunngitsunit ingerlateqqinneqarsimalluni.
Facebookimik atuisut ilaasa Paamiuni peqqissaasut akisussaasuusoralugit pisuutillugit sakkortuumik qisuariaateqarput.
Taamaattorli ajoqqusertoqarsimatillugu piaartumik aallartitsinissaq peqqissaasut aaliangerneq ajoraat nakorsat qullersaat nassuiaavoq.
- Nakorsaaneq immikkut ilisimasalik attavigineqartarpoq, taassumallu napparsimasoq piaartumik aalarunneqassanersoq aaliangertarpaa, nakorsat qullersaat Anne Marie Ulrik KNR-imut oqarpoq.
- Napparsimasup qanoq innera, aaversinnera, tarrarsortinnera misissuinerillu allat aallaavigalugit nalilerneqartarpoq napparsimasoq piaartumik aallarunneqassanersoq.
Jogvani ullumikkut pilatsissasoq naatsorsuutigineqarpoq.
Qanoruup ilanngutassiaa allaaserisap qulaaniittoq takuuk.
Aamma atuaruk Paamiunit Nuummut nakorsiussisoq