Paamiunit Nuummut nakorsiussisoq
Steffen Poulsen Andersenip nukappiaqqap pingasunik ukiullip taliata arfininngormalli napineranit qanoq pisoqarnersoq malinnaaffigisimavaa. Nukappiararlu pineqartoq ulluni qaninnerni Nuuliaanneqarsinnaanngitsoq ippassaq paasinarsimmat iliuuseqarniarluni aalajangerpoq.
- Nukappiarannguup anniartup Nuuliaanneqarani utaqqeqqinnissaa akuerisinnaannginnakku aalajangerpunga nammineq iliuuseqarniarlunga, Steffen Poulsen Andersen nukappiaqqamut ningaajusoq KNR-imut oqaluttuarpoq.
Steffen Poulsen Andersen ippassaq ataasinngornermi unnukkut angallammik attartugassarsigami illooqqani ilagalugu Paamiunut aallarpoq.
Aamma atuaruk Anaanaasup ikioqqunera attortinnartoq
Unnuakkut nalunaaquttap marlut qaangeraa Paamiunit nukappiaraq ilaqutaalu ilagalugit Nuummukarput.
Nuup tungaanut akunnerit arfinillit missaanni ingerlaarnerminni nukappiaraq anniartoq nalligalugu ilungersorsimalluni Steffen oqaluttuarpoq.
- Nukappiaqqap talia napimmalli sinissinnaasimannginnami aallanngitsiarlunilu nipaallisaammik tunisissimariarami ingerlaarnitsinni sinillattaavoq. Talinili anniaralugu iteqattaarluni, Steffen Poulsen Andersen oqaluttuarpoq.
- Nukappiaqqap ikiorneqarnissaa pingaarnerpaavoq. Qujanartumillu Nuummut apuupparput.
Akueriuminaatsitsisoq
- Takusinnaallugu anniartoq nallinnaqaaq. Tupinnaqaaq Nunatsinni atugassarititaasut taamaammata. Peqqinnissaqarfimmi pissutsit pitsaanerusinnaapput. Nukappiaqqap misigisaa allanut misigeqqunanngeqaaq, Steffen Poulsen Andersen KNR-imut oqarpoq.
Taanna isumaqarpoq Nunarput isorartoqimmat pisumut assingusunik pisoqarnissaanut Peqqinnissaqarfik piareersimanerusariaqarlunilu pitsaanerusumik innuttaasunik sullissisinnaagaluartoq.
Peqqinnissaqarfimmit oqaaseqartitsinissaq KNR-imi sulissutigaarput.