Anaanaasup ikioqqunera killitsinnartoq

NUTARTIGAQ Nukappiaqqap Paamiormiup pingasunik ukiullip arfininngormat talia napimmat soorlu ajornerusumik pisoqarsinnaanngitsoq. Sunaaffali ilaqutariinnguit ullut nalorninartut ilungersorfiusullu nalaannialeraat.

Allattoq Mads Pedersen

juunip 07-at 2016 12:20

Anaanaasup Facebookikkut ikioqqulluni suaaruteqarnerani tamanna erserpoq.

- Ernitta pingasunik ukiullip talia arfininngormat napivoq. Paamiuniippugut, suneqarsinnaanngilaq. Nuummi suliarineqartussanngorpoq. Nipaallisaataasinnaasunik allanik ujaasigaluarput nassaanngillat. Pamolit tunniuppaat oqarlutilli iluaqutaanavianngitsut, nukappiaqqap arnaa Dea Poulsen Facebookimini ilungersorpaloqaluni ikioqqulluni taama allappoq.

- Arfininngormalli suli sininngilagut, nukappiaqqap anniarsimaqisup arnaa nangilluni allappoq.

Piaartumik aallarunneqanngitsoq

Takorloorneqarsinnaagaluarpoq nukappiaqqap piaartumik suliarineqarnissaa anguniarlugu pinartutut aallarunneqassasoq.

Taamaattoqanngilarli.

- Naammagittarsinnaajunnaarpugut. Ullut pingajussaarparput. Sinissinnaanngivippoq, anniarujussuarpoq. suliaritittariaqavippoq, piaartumik nuuliaattariaqarpoq, qanoq iliussaagut?, anaanaasoq Dea Poulsen ikioqqulluni aperivoq.

Anaanaasup allaaserisaa naapertorlugu nukappiaraq piaartumik aallarunniarneqarsimanngilaq. Aatsaalli tallimanngorpat timmisartumi inissaqassaguni Nuuliaanneqarsinnaassalluni.

Nammineq iliuuseqartariaqartut

Qujanartumilli ilaqutaasup Nuummit aasinnaasimavai. Steffen Poulsen Andersenip nammineq akiliilluni angallammik attartorluni aasinnaasimavai. KNR-imit paasisagut kingulliit naapertorlugit nukappiaraq Dronning Ingridiup napparsimmavissuanut apuussimalerpoq.

Dea Poulsenip Facebookikkut ikioqqunera 1.700-riarluni ingerlateqqinneqarsimavoq.

Peqqinnissaqarfimmit oqaaseqartitsinissaq KNR-imit sulissutigaarput.

Aamma atuaruk Paamiuniit Nuummut nakorsiussisoq

Sullissineq pissusissamisut pisoq

Ilaqutariit pineqartut naammaginanngitsumik sullinneqarsimasutut misiginerat Peqqinnissaqarfiup ajuusaarutigaa. Taamaattorli sullissineq pissusissamisut ingerlasimasoq Peqqinnissaqarfimmit erseqqissaatigineqarpoq. Nukappiaraq gipsilerneqarsimavoq nipaallisaatinillu tunineqarsimalluni. Suliarineqarnissaanullu utaqqisitsineq illersorneqarsinnaasoq, Anne Marie Ulrik, nakorsaaneq, KNR-imut nassuiaavoq.