Nakorsaaneq: Neriuppugut ukiortaarsimatsiaannartoq akiuussutissaliisinnaalissalluta

Coronamut nunatsinni akiussuutissaqaleqqajaavoq – kisianni suli ungasillisimaarlutalu assagut tunillannartuiaammik salittarallassavagut.
Coronavirusimut nunatsinni akiuussutissaqaleraluartorluunniit, nunarsuarmi suli tunillaassuuttoqassaaq. Taamammat erngertumik killilersuutaarukkunnanngitsoq, nakorsaaneq nassuiaavoq. Assi © : KNR
Allattoq Johannes Baunsgaard , Jens Betak
decembarip 14-at 2020 04:41

Coronamut akiuussutissaqaleqqajaasinnaavoq. Danskit peqqissutsimut ministeriat, Magnus Heunicke tusagassiortunut sisamanngornermi sassarami taama oqarpoq.

- Immikkut ilisimasallit, EU-mi akiuussutissanik akuersissusiisussat, nalunaarutaat kingulleq naapertorlugu akiuussutissaq ullut 21-t qaangiuppata – tassa decembarip ulluisa 31-anni akiuussutissamut tunngasumik aalajangiiffigisinnaassapput. Tamatuma kingunitsianngua danskit siulliit akiuussutissalersinaavagut. Maannakkut allannguinaveersaassaagut, nakorsaaneq oqarpoq.

AAMMA ATUARUK Peqqissutsimut ministeri: Tamat coronamut akiuussutissamik neqeroorfigineqassapput

Danmarkimi, Kalaallit Nunaanni Savalimmiunilu innuttaasut tamarmik covid-19-imut akiuussutissamik kapitinnissamut neqeroorfigineqassapput. Nakorsaanerullu ukiup nutaap aallartinnerani siulliit kapineqarsinnaanissaat neriuutigaa.

Danmarkimi matooraasoqartoq

Akiuussutissamilli kapisisoqartalereerpat, nunatsinni qanoq sivisutigisumik killilersuisoqassava?

- Maannakkut tamatuma siulittornissaa ajornakusoortorujussuuvoq. Ukioq nutaaq aallartilaaginnartoq akiuussutissalersuilereersinnaassalluta neriuutigaarput. Qanoq sukkatigisumik sunniuteqarluartigisumillu iluaqutaassanersoq ilisimanngilarput. Nunatsinni tikittut aallarfigisaanni, pingaarnermik Danmarkimi, pissutsinut qanoq innerat apeqqutaalluinnassaaq,  Henrik L. Hansen oqarpoq.

Covid19 Danmarkimi maanna tuniluteqaaq. Tunillatsissimasutut uppernarsarneqartut nutaat tallimangornermi 3075-iupput, misissuivinnilu utaqqinissaq sivisulluni.

Danmarkimi kommunit 69-it ilaatigut matoqqatitsiffiupput, meeqqat atuarfiini atuartut angerlarsimaffimminni atuarput, taavva aamma sutorniartarfiit neriniartarfiillu matoqqapput. Nunarput sanilliukkutsigu killilersuiffiunnginneruvugut. Nunatsinnulli angalasut piffissami sivisuumi killilersuiffiupput, Namminersorlutik Oqartussallu Danmarkimut juullikkunni angalasoqannginnissaanik qinnuiginnipput. 

AAMMA ATUARUK Corona pillugu aqutsisoqarfik: Danmarkimut angalanissaq isumatsialaannginnerpaavoq

Akiuussutissaq maanna piariingajalerpasimmat, inuunerup nalinginnaaleqqinnissaanik tamanna isumaqarpa?

- Naamik, taama isumaqassalluni neriulluarneruallaarunarpoq. Akiuussutissamik pissarsigaluarultaaluunniit suli unammillernartoqassaaq. Akiuussutissap qanoq sivisutigisumik sunniuteqarnissaa ilaatigut ilisimanngilarput. Nunarsuatsinni coronavirusimik suli tunillaassuuttoqarnera unammillernartoqartitsissaaq. Taamaammat coronavirusip uteqqeratarsinnaanissaanut nutaamik aarlerinartoqartuaannassaaq, Henrik L. Hansen oqarpoq.

Aamma atuaruk