Nakorsaaneq: Moderna meeqqanut inuusuttunullu 18-iliineqanngitsunut unitsinneqarallarpoq

Danmarkimi 18-iliineqanngitsut Modernamit akiuussutissamik neqeroorfigineqartarunnaarput.

Taakku PfizerBioNTechimeersumik neqeroorfigineqartalissapput.

Tamanna mianersorniarnermik tunngaveqartoq, Peqqinnissamut aqutsisoqarfik ullumi paasissutissiivoq.

Nunatsinni aamma taamaaliortoqassaaq. Nakorsaaneqarfiup Modernamit akiuussutissaq 18-iliineqanngitsunut sapaatip akunnerata sinnerani aamma neqeroorutigiunnaarniarpaa.

- Nunanit avannarlernit misissuinermit paasissutissaagallartut inuusuttunnguit 18-iliineqanngitsut Modernamit akiuussutisserneqarnikkut uummatikkut aseruuttoorsinnaanerannut annikitsumik aarlerinartoqarnerusoq takutippaat, nakorsaaneq, Henrik L. Hansen oqarpoq.

- Akiuussuserneqannginnerup aarlerinartoqarnerunera qularutissaanngilaq.

- Danskit Peqqinnissamut aqutsisoqarfiata suleqatigineratigut neqerooruteqarnermut tunngatillugu nalilersuisoqarnerani mianersornissamik tunngaveqartumik 18-iliineqanngitsut akiuussusersorneqarnerat unitsikkallarniarlugu aalajangerparput, nakorsaaneq oqarpoq.

Suliaq ulluni aggersuni oqallisigineqassasoq

Akiuussutissaq Modernameersoq nunatsinni meeqqanut inuusuttunullu 18-iliineqanngitsunut ullumikkut atorneqartarpoq.

Nakorsaanerup immikkut ilisimasallit ullumi oqaloqatigai tassanilu Modernap atornerani aarlerinartoqarnera naliliiffigineqarluni.

- Danskit peqqinnissamut aqutsisoqarfiani akiuussusersuinermi immikkut ilisimasallit pissutsit pillugit oqaloqatiginiarlugit ullumi attaveqarfigaakka. Nunatsinni pissutsit Danmarkimi pissutsinut sanilliullugit allaanerungaatsiarput, tamanna Pfizer/BioNTechimit akiuussusersuiniarnerup ajornakusoornerungaatsiarnera ilaatigut pissutaavoq.

- Nunatsinni immikkut ittumik unammillernartut ulluni qaninnerusuni oqallisigiumaarlugit isumaqatigiissutigaarput, Henrik L. Hansen oqarpoq.

AAMMA ATUARUK Akiuussuserneqarniartut amerlajunnaarmata kapisisarnerit nuunneqartut

Danmarkimi uummatip nukingatigut aseruuttoortoqarneranik arlalinnik paasisaqartoqanngilaq. Nunatsinni meeqqat inuusuttullu 3.000-init amerlanerusut Modernamit akiuussuserneqarfigisaanni ataatsimik taama nalaataqartoqarpoq.

- Uummatip nukingatigut aseruuttoortoqarneranik ataasinnguamik naammattuuivugut, taassa nakorsaaserneqarnani nammineq qaangiuteqqippoq. Innuttaasulli akiuussutissaatigut pillugit tatiginnissinnaanerat pingaarluinnarpoq, taamaammallu Peqqinnissamut aqutsisoqarfik suliamut tunngatillugu naliliinermut ilaanissaannik qinnuigaakka, Henrik L. Hansen oqarpoq.

Uummatip nukingatigut aseruuttoorneq saniatigut sunniutaasinnaasuni qaqutigoorluinnartuuvoq.

Nakorsaanerup oqarnera naapertorlugu tamanna amerlanertigut sakkukitsuusarpoq namminerlu qaangiuteqqittarluni. Nakorsaanersuisoqarnissaanik pisariaqartitsisoqartillugu katsorsaanissamut periarfissagissaartoqarpoq. 

Nunatsinni akiuussutissat assigiinngitsut marluk tassa Modernameersoq aamma Pfizer/BioNTecimeersoq maannamut atorneqarsimapput.

Pfizer/BioNTechimeersoq atorniarnera ajornakusoorneruvoq, taannami 70-init 80-inut nillissuseqartumiitsinneqartussaavoq.