Nakorsaaneq Ilulissani pissutsit pillugit: Tunillatsissimasinnaasut tamaasa oqaloqatigaagut

Inuit arfinillit nunatsinnut decembarip ulluisa 15-ianni 16-iannilu tikittut covid-19-imik tunillatsissimasut ippassaq sapaammi unnukkut paasineqarput.

Taakku tamarmik tikinnerminnit ullut tallimassaanni misissorteqqissamik tunillatsissimasut paasineqarput.

Pissutsilli ullumikkut nakkutigineqarsinnaasut, nakorsaaneq, Henrik L. Hansen oqarpoq.

- Tunillatsissimasinnaasut paasiarnerat ingerlalluartorujussuuvoq. Politiit tikissimasut erngertumik oqaloqatigilerpaat, tamarmillu pissarsiaralugit Henrik L. Hansen oqarpoq.

- Ilulissani pissutsit eqqissisimasorujussuit takuagut, pissutigalugu angalasut angerlarsimaannaqqusaanermut aalajangersakkat maleqqissaarsimammatigit, taamaammat ilisimaneqanngitsumik tunillatsissimasinnaasoqarnissaanut takussutissaqanngilaq.

AAMMA ATUARUK Borgmesteri Ilulissani inuit tunillanneqarsimasut pillugit: Tuniluuttoqarnera pakkersimaarneqarpoq

Inuit arfinillit eqimattani pingasuni avissaaqqapput: Ilaqutariit pingasut, taakkunannga marluk ilulissanut angalasuupput.

Allat angalasut aamma tunillatsissimapput.

Tunillatsissimasut arferngat nunatsinnut allamik aamma angalaqateqarpoq, taannali covid-19-imik tunillatsissimanngilaq.

Tunillatsissimasinnaasut tamarmik attavigineqartut

Tunillatsissimasut pillugit maannakkorpiaq nutaarsiassaqanngitsoq, nakorsaaneq oqarpoq, tunillatsissimasunili ataaseq ”annikitsunnguamik ersiuteqartoq”, oqaatigaa.

Tunillatsissimasinnaasut paasiniarlugit politiit Nakorsaaneqarfillu tunillatsissimasut attavigisimasaat paasiniarlugit ulappussimapput.

Aamma illoqarfimmut tikinneranni taxartitsut pissarsiarineqarlutik.

- Taxanik ingerlatsisut saniatigut allanik qanillisaqarsimasinnaanerannut takussutissaqanngiivippoq, taxanillu ingerlatsisut pissarsiaraagut. Taakku aamma misissorneqassapput, nakorsaaneq oqarpoq.

Naalli Ilulissani innuttaasunut ernumanarsinnaagaluartoq nakorsaaneq eqqissisisaavoq. Ersiuteqanngikkuit covid-19-imut misissortinnissanik noqqaassuteqarnak, nakorsaaneq oqarpoq.

AAMMA ATUARUK Ilulissat: Inuit arfinillit covid-19-mik tunillatsissimapput

- Tunilaltsissimasinnaasut tamarmik oqaloqatigaagut. Aamma kikkut tamarmik maanna misissortikkusunnerat suliamullu attuumassuteqarnatik iluaqutaanavianngilaq. Tassunga inissaqartitsisoqanngilaq, isumalluutillu eqqortunut misissuinermut atussavagut.

- Ilulissani piffisasmi matumani napparsimagaanni covid-19-imullu ersiutaasinnaasunik peqaraanni peqqinnissaqarfimmut sianertoqassaaq. Peqqinnissaqarfiullu tunillatsittoqarsimasinnaanera ilimanarnersoq tassanga naliliiffigissavaa, tassanilu misissortittoqassalluni.

Nunatsinnut angalannginnissinni Danmarkimi mianersoritsi

Nakorsaanerup nunatsinnut angalasut tamarmik Kangerlussuarmut angalanissamut sapaatit akunneri sioqqullugit mianersulereernissaat kaammattuutigaa.

- Danmarkimi tunillaassuuttoqangaatsiarpoq, taamaammat aallannginnermi tunillatsissinnaanermut ilimanaateqarneruvoq, nakorsaaneq oqarpoq.

- Aallannginnermi sapaatit akunneri marluk sioqqullugit mianersungaatsiarnissaq sapinngisamillu angerlarsimaannarnissaq pingaaruteqarluinnarpoq.