Nakorsaaneq eqqissisaavoq: Uummannami atuartut atuariartukutsoorsinnaapput
Uummannami coronamik tunillatsissimasoqartoq uppernarsaasoqareersoq aqaguani meeqqat atuarfianni atuartuni 198-ini taamaallaat 57-it atuariartorput.
Suliaq naatsumik:
Peqqinnissaqarfimmi sulisoq covid-19-imik tunillatsissimasoq sapaatip-akunnerata siuliani sisamanngornermi uppernarsarneqarpoq.
Tunillatsissimasoq Danmarkimit tikissimavoq, taannalu Uummannamut tikinnerminit ullut arfineq-marlussaanni misissortippoq.
Misissuinermi tunillatsissimasoq paasineqarpoq. Tunillatsissimasumillu Uummannami aatsaat siullerpaamik uppernarsaasoqarluni.
Inuit ikinnerpaamik qulit angerlarsimaannarallartussanngortinneqarput.
Tunillatsissimasup qanillisimasai tamarmik arfininngormat misissorneqarput. Misissugassat tamarmik Ilulissat misissuisarfimmi misissorneqarput, taakkulu tamarmik tunillatsissimanngillat.
Ernummatissaqanngitsorli Uummannamilu innuttaasut pisarnermisut ingerlaannassasut, nunatta nakorsaanera oqarpoq.
AAMMA ATUARUK Coronamik tunillatsissimasumik Uummannami uppernarsaasoqareernerani 57-iinnaat atuariartortut
- Covid-19-ip Uummannami tunillaassuunneranik takussutissaqanngilaq. Tunillatsittup inuit naapisimaarnikuusai tamarmik misissorneqareernikuupput, taamaattumik tunillaasuuttoqarneranik takussutissaqanngilaq, Nakorsaaneq Henrik. L. Hansen oqarpoq.
Atuartorpassuit suli atuariartoqqinngitsut
Tunillatsissimasoq sapaatit akunnerata siuliani sisamanngormat paasineqarpoq. Tunillatsissimasoq peqqinnissaqarfimmi sulisuuvoq, inuillu qulit missaanniittut kingorna angerlarsimaqquneqarput.
AAMMA ATUARUK Naalakkersuisut: Uummannami tuniluuttoqarneranik takussutissaqanngilaq
Sapaatit akunnerani matumani atuariartoqartarpoq, amerlanerilli atuariartunngillat.
- Atuariartortartut amerliartortut takusinnaavarput. Kisianni meeqqat 60-it 70-illu akornanniittut suli amingaataapput, Uummannami atuarfiup Edvard Krusep pisortaa, Tim Arnoldi KNR-imut ullumi oqarpoq.
Nakorsaaneqarfimmullu ernumalersitsivoq.
- Meeqqat atuarfianni atuartut arlallit ulluni kingullerni atuariartortarsimanngitsut tusarlugit ajuusaaqaagut, Nakorsaaneq oqarpoq.
AAMMA ATUARUK Malittarisassat nutaat: Nunatsinni peqqinnissaqarfimmut suliartortut tikereernermini coronamut misissortittassapput
Nunattalu nakorsaanera angajoqqaat meeqqatik atuariartortinnissaat qulakkiissagaat kaammattuivoq, nakorsaaneq kaammattuivoq.
- Angajoqqaat meeqqatik atuariartorteqqissagaat kaammattorpagut.
Innuttaasullu Covid-19-imut maleruaqqusanik nalornisaqarunik nunatsinni nakorsaaneqarfiup oqarasuaatanut 801100-imut sianerlutik paasiniaanissaminnut tikilluaqqusaasut, taassuma ilisimatitsissutigaa.
