Nakorsaaneq: Coronamut akiuussutissat 3.000-t nunatsinnut tikingajalerunartut
Covid-19-imut akiuussutissat 3000-t missaat nunatsinnut juullip ukiortaallu akornanni tikissagunarput.
Nakorsaaneq Henrik L. Hansen taama oqarpoq.
Taamaammat Nakorsaaneqarfik nunatsinni kikkut akiuussuserneqarnissamik neqeroorfigeqqaarnissaannut ulluni makkunani pilersaarusiuleruttorpoq.
- Nunat allat akiuussusiinermut pilersaarutaannut assingusumik akiiuussusiinissamut pilersaarusiuleruttorpugut. Piareerpat Naalakkersuisunut saqqummiutissavarput, taanna oqarpoq.
AAMMA ATUARUK Naalagaaffeqatigiit tamarmik coronamut akiuussutissaalerumaartumik qulakkeerissaasut
Akiuussutissat nunatsinnut tikittut Danmarkimeersuussapput. Coronaviruseqarunnaartitsisinnaasumimmi akiuussutissaqalissagaluarpat, Danmarkimi, Kalaallit Nunaanni Savalimmiunilu innuttaasut tamarmik akiuussutissinnissaat qulakkiigaasoq, danskit peqqissutsimut ministeriat oktoberip qaammataani oqarpoq.
Danmarkimi siumukartut
Akiuussutissat atorneqarsinnaanngornissaat ilimagisamit siusinnerusukkut akuerineqaratarsinnaasoq, danskit peqqissutsimut ministeriat Magnus Heunicke (S) marlunngormat ualikkut nalunaarpoq.
Pfizerip Biontechillu coronavirusimut akiuussutissaliaat atorneqarsinnaanngussanersut immikkut ittumik decembarip ulluisa 21-anni ataatsimeersuarnermi aalajangerneqassasoq, Europami nakorsaatinut aqutsisoqarfik EMA nalunaarpoq.
Coronavirusimut akiuussutissat EU-mi akuerineqassappata, Danmarkimi ukiortaannginnerani akiuussusiisoqartalissasoq, danskit nakorsaatinut aqutsisoqarfiata pisortaa Thomas Senderovitz oqarpoq.
Akiuussutissat asseqanngitsut
Tamanna nunatta nakorsaaneranut tusarluarnarpoq. Akiuussutissalli taakkua akiuussutissanit allanit ilisimaneqareersunit soorlu nualluummut akiuussutissanit meeqqanullu akiuussutissiissusianit allaaneroqimmata asseqanngitsuusut, taanna aamma erseqqissaavoq.
- Akiuussutissat nunatsinnut tikissangatinneqartuni tikittut siulliit 80 gradinik nillertigisumi qerititsivimmiittussaapput.
- Nunatsinni qerititsiviit taama nillertigisinnaatigisut sisamaannaammata, tamanna unammilligassarujussuuvoq. Qerititsiviillu taakkua tamarmik Nuummiipput, taanna oqarpoq.
Naalakkersuisoq: Killilersuinerit akiuussusiisalerutta qasukkarneqarnavianngillat
Nunatsinni innuttaasut tamarmik akiuussuserneqarnissamik qaqugu neqeroorfigineqarumaarnersut, nakorsaanerup oqaatigisinnaanngikkallarpaa.
AAMMA ATUARUK Nakorsaaneq: Neriuppugut ukiortaarsimatsiaannartoq akiuussutissaliisinnaalissalluta
- Tamanna massakkorpiaq oqaatigisinnaanngilarput. Kialuunniit oqaatigisinnaanngilaa. Akiuussutissalli nunatsinnut 2021-mi qaammatini siullerni marlunni pingasunilu tikittut ima amerlatigisinnaapput, allaat nunatsinni tamanut neqeroorutaasinnaallutik, taanna oqarpoq.
- Neriuppugulli pissutsit tamatuma kingorna pitsanngorumaartut.
Nakorsaaneq inuit juullisiorluarnissaannik kissaassigaluartoq, peqqissutsimut naalakkersuisup, Anna Wangenheimip (D), inuit eqqissisimasumik juullisioqquai.
- Killersuinerit akiuussusiisalerutta atorunnaarnavianngillat. Killilersuinerit oqimaaqatigiissummik atorunnaariartuaarsissavagut. Taamaammat erseqqissaatigissavara angerlarsimaannaqqusaanermut maleruagassat malinneqartuarsinnassasut. Maleruagassallu allat qanillivallaannginnissamut assaallu eqqiluitinnissaannut tunngasut aamma atuuttuarsinnassapput, taanna oqarpoq.