Naalagaaffeqatigiit tamarmik coronamut akiuussutissaalerumaartumik qulakkeerissaasut
Coronavirusimut akiuussutissaqalerpat, innuttaasut tamarmik akiuussutissamik eqqanaarunneqareerput.
Tamanna peqqinnissamut ministerip Magnus Heunickep (S) naqissuserpaa. Coronavirusip Danmarkimi tuniluunnerata killiffia pillugu tusagassiortunut ullumi sassarnermi tamanna pivoq.
Tassami Danmark akiuussutissaalerumaartumik tunisassiortussanit pingasunit pisereerpoq. Tunisassiortut tassaapput Astrazeneca, Sanofi-GSK aamma Johnson & Johnson.
- Akiuussutissaq akuerineqassagaluarpat, Danmarkimi, Savalimmiuni Kalaallit Nunaannilu innuttaasut akiuussutisserneqarumasut tamarmik akiuussutissaannik naammattumik pissaqalerumaarpugut, ministeri tusagassiortunut oqarpoq.
Nakorsaasiorfiit coronavirusimut, nunarsuatta ilatsiarsuani ilungersortitsisumut, akiuussutissamik inerisaasut arlaqarput.
Akiuussutissatut inerisagaasut isumalluarfigineqarnerpaasut ilaat tassaavoq Astrazeneca, misiligaanermi naggataasersuutaasoq.
Corona aattuutilertoqisoq
Coronavirusip Danmarkimi tuniluunnera malunnartumik ingatsittoq unikaallatsinniarlugu killilersuissuutit amerlasut tusagassiortunut sassarnermi saqqummiunneqarput.
Assersuutigalugu imigassamik tuniniaaneq nalunaaqutaq unnukkut qulip kingorna inerteqqutaalerpoq, taavalu inuit katersuuttut qulinit amerlaneroqqusaajunnaarlutik.
Danmarkimi coronavirusimik tunillanneqarsimasutut nalunaarsukkat tallimanngornermi 859-iupput, aatsaat taama amerlatigalutik.
Nunatsinni tunillanneqarsimasoq ataaseq ilisimaneqarpoq, taassumali oqartussat maleruaqqusaat malissimanngimmagit, tuniluunnerup siaruaassimasinnaanera aaleqqutaavoq.
Inuit qulit Aasianni maannakkorpiaq angerlarsimaannarallartussaapput, taavalu Inatsisartut aningaasaqarnermut akileraartarnermullu ataatsimiititaliaani ilaasortat angerlarsimaannarallartussaanikuullutik, soorluttaaq Sisimiuni ilinniarfimmi ilinniartut taama pisussaanikuusut.
