Nakorsaaneq: Coronamut akiuussutissamik pingajussaaneernissamik 2022-mi tamanut neqeroortoqassaaq

Nunatsinni innuttaasut tamarmik coronamut akiuussutissamik pingajussaanik kapitinnissamut 2022 naatinnagu neqeroorfigineqassapput.

Naggataamik kapitinnerunersoq, imaluunniit sisamassaaneernissamut, tallimassaaneernissamut arfinilissaaneernissamulluunniit aamma piareersassanersugut suli oqaatigineqarsinnaanngilaq.

- Utoqqaat illuanniittut qanoq pingajussaanik kapitissanersut pilersaarusiuleruttorparput, nakorsaaneq, Henrik L. Hansen oqarpoq.

- Ukioq 2022 aallartikkutsigu kikkut tamarmik pingajussaanik kapitinnissamut neqeroorfigineqarnissaat qularnanngilaq, nakorsaaneq oqarpoq.

- Ukiuni tulliini aamma taamaattoqassanersoq oqaatigissallugu siusippallaarpoq. Nunani tamalaani pissutsit qanoq ineriartornersut apeqqutaalluinnarpoq.

Coronamik nunarsuaq tamakkerlugu tunillaassuunneq nunarsuup ilarujussuani appariartorpoq, nunatsinnili aasaanerani aamma tunillaassuuttoqalerluni. Sulilu tuniluuttoqarpoq.

Tunillatsissimasut suli 100-init amerlanerusut

Nunatsinni akiuussutissamik siullerpaamik januaarimi neqerooruteqartoqarpoq. Tamanna Nuummi utoqqaat illuanni pivoq, tassanilu politikerit, peqqinnissaqarfimmi sulisut, tusagassiortut assiliisullu aamma najuullutik.

Tamatuma kingorna akiuussutissalersuisoqangaatsiarpoq. Innuttaasut 71 procentii siullermeertumik kapitereersimasut 64 procentiilu aappassaaneertumik kapitereersimallutik.

AAMMA ATUARUK BioNTechip coronavirusimut akiuussutissaq meeqqanut mikisunut akueritikkusukkaa

Malittarisassat maannakkutut itsillugit meeqqat aqqaneq-marlunnik ukioqalereersimasut akiuussutisserneqarnissamik neqeroorfigineqartarput. Malittarisassallu taakku allanngortussaarpasinngillat. Tuniluuttoqaannarsinnaasormi nakorsaaneq naliliivoq.

- Nunarsuaq tamakkerlugu qanoq sivisutigisumik tuniluuttoqassanersoq oqaatigiuminaappoq, 2022-mili aamma tuniluuttoqarnissaa qularutigineqarsinnaanngilaq. Meeqqat akiuussuserneqarsimanngitsullu nunarsuaq tamakkerlugu tunillaassuunnermik ingerlatitsiinnarnissaat qularnanngilaq, Henrik L. Hansen oqarpoq. 

- Nunatsinni meerarpassuaqarpoq. Meeqqat akiuussuserneqarsimanngitsullu akornanni tunillaassuuttoqaannarnissaanut periarfissaqarluarpoq.

Siunissaq nalunartoq

Danmarkimi oqartussat pingajussaanik kapuileruttorput.

Utoqqaat iluanni najugaqartut inuillu timiminni akiuussutissakitsut akiuussutissamut sakkortusaataasumik danskisut boosterimik taaneqartartumik kapoorneqaleruttorput. Utoqqaat 85-inik ukiullit tulliullutik akiuussutisserneqaqqissapput.

Tamanna oqartussat amerlanerit ulluinnaanni coronap arlaatigut ilaaleriartornissaanut piareersarneranni pivoq.

AAMMA ATUARUK Biden pingajussaa akiuussusertittoq

- Nunarsuarmi sumiiffippassuarni pisutulli coronamik tuniluuttoqalinnginnerani inooriaaserisimasatsinnut sukkasuumik uteriartorpugut. Taamaakkaluartorli amerlasuut maani suli initussapput.

- Ilaatigut inuiaqatigiinni tunillatsissimasoqaannassaaq, pissutigalugu angalasartut amerleqqissammata. Aamma kikkut tamarmik sunniuteqarluartumik akiuussutisserneqarnissaanik qulakkeerinissaq unammillernartuussammat.

- Tamanna akiuussuserneqaqqinnissatsinnik kinguneqassaaq.

KNR.gl-imi isummersorfik teknikkikkut ajutooqqavoq. Ajoqutaa misissorparput.