BioNTechip coronavirusimut akiuussutissaq meeqqanut mikisunut akueritikkusukkaa
Tyskit nakorsaasiorfissuata BioNTechip coronamut akiuussutissaatini meeqqanut tallimanit aqqanilinnut ukiulinnut akuerineqarnissaa qinnutiginiarpaa.
BioNTechip pisortaa, Özlem Türeci tyskit aviisianut, Der Spiegelimut tallimanngornermi oqarpoq.
- Akiuussutissap tallimanit aqqanilinnut ukiulinnut atorneqarsinnaaneranut misissuinerup inerneri nunani tamalaani oqartussanut sapaatini akunnerni aggersuni takutinniarparput, ukioqatigiiaanullu taakkununnga atorneqarsinnaanissaanut qinnuteqarniarluta - aamma maani Europami, pisortaq oqarpoq.
BioNTechip coronamut akiuussutissaq amerikamiut suliffeqarfiat Pfizer peqatigalugu suliaraa.
Akiuussutissaq taanna Danmarkimi akiuussusersuinermi pisortatigoortumik atorneqartunut ilaavoq. Tassanilu Moderna aamma ilaalluni.
BioNTechip meeqqanut mikisunut akiuussutissaliorneq aallartippaa. Meeqqat inersimasunut akiuussutissap assinganik pissarsinissaat pilersaarutaavoq, akiuussutissalli imassaa annikinnerussalluni.
Tyskit suliffeqarfiata meeqqanut akiuussusersuinermi paasissutissat misissuleruttorpai. BioNTechip misissuinerit inerneranik ukiup naanerani saqqummiussinissaa naatsorsuutigineqarpoq.
Pfizer/BioNTechimit Modernamiillu coronamut akiuussutissat aqqaneq-marlunnik ukiulinnit meeqqanut inersimasunullu atorneqarsinnaanerat maanna akuerisaavoq.
Danskit innuttaasuisa 73 procentii tamakkiisumik akiuussuserneqareerput.
