Nakkutilliisut: Suliasat 200-t qaammatini sisamani suliarineqassasut
Isumaginninnikkut misissuinerit qaammatit sisamaatinnagit aallartereerneqassapput, kingornalu iliuuseqarnissamut pilersaarutit qaammatit marluutinnagit piareeqqassallutik.
Nakkutilliinermik ingerlatsivik taama ersaritsigisumik Kommuneqarfik Sermersuumut peqqussuteqarpoq.
Kommuneqarfik Sermersuup isumaginninnikkut suliassat tamaasa qaammatit arfinillit ingerlanerini suliarereersimanissaannut nakkutilliinermik ingerlatsivimmit peqqussut naammassisinnaassappagu sulissussaqarnerunissamik Danmarkimut kissaat eqquutsinneqartariaqarput. Kommuneqarfik Sermersuup Meeqqanut ilaqutariinnullu ingerlatsivimmii pisortaa Martha Lund Olsen oqarpoq.
- Ikiorserneqanngikkutta ilimanarpallaanngilaq qaammatit sisamat ingerlaneranni taakku suliassat tamaasa suliarisinnaanissaat, Martha Lund Olsen naqissusiivoq.
Suliassat 200-t allattorsimaffimmiittut
Nakkutilliisut kommunimi isumaginninnikkut sulianik maajimi juunimilu kalerreeqqaarnatik nakkutiginnipput nalunaarusiorlutillu. Kommuneqarfik Sermersuumi siornamiit ukioq manna maaji tikillugu nalunaarutiginninnerit 664-iusut nalunaarusiami erserpoq. Taakkunannga suliat aqqanillit isumaginninnikkut misissuiffigineqarsimapput, suliallu 200-t missaanniittut misissuiffigineqartussaasunut allattuiffimmiillutik..
AAMMA ATUARUK Isumaginninninnermi nakkutilliisoqareerneratigut pitsanngorsaateqangaatsiarpoq
Martha Lund Olsenilu suliassarpassuit naammassiniarlugit sulisussanik 17-inik Naalakkersuisunut kissaateqarpoq.
Qanoq iliuuseqarnissaq paasiniarlugu isumaginninnikkut misissuinerit meeraq pillugu nalunaartoqarnerata kingorna aallartittarput. Tassani meeqqap atugai, ineriartornera ilaqutaasalu akornanni pissutsit misissorneqartarput.
Kommuni isumaginninnikkut misissueqqaarnani maannakkut iliuuseqartarpoq, tamannalu ajornartorsiutinik pilersitsisinnaasoq, nakkutilliinermik ingerlatsivimmit isumaqarput. Eqqunngitsumimmi suliaqartoqarsinnaanera ernummatigaat. Meeqqalli atugaasa pitsaanerutiaarnissaat allaffissornermit pingaarnerusoq pisortaq isumaqarpoq.
Iliuusissanik qinigassakippoq
- Nalunaarusiamik tigusaqaraangatta pingaartittarsimavarput isumaginninnikkut suliallit arlaatigut iliuuseqarnissaat. Meeraq massakkorpiaq qanoq ikiorneqarsinnaava? Taanna salliutittarsimavarput, isumaginninnermut tunngassuteqartunik misissuinerit piareerneqarnissaat utaqqinngikkaluarlugit.
Angerlarsimaffiup avataanut inissiinerup saniatigut Tasiilami iliuuserineqarsinnaasut amerlanngimmata, iliuusissatut pilersaarusiornissaq peqqutissaqarpallaanngitsoq Martha Lund Olsen nassuiaavoq.
-Tarnip pissusianik ilisimasalinnik, ilaqutariinnut sullissisunik sulisussaqartuugutta allatut isikkoqarsinnaassagaluarpoq, Martha Lund Olsen oqarpoq.
AAMMA ATUARUK Meeqqat illersuisuata nakkutilliisut nalunaarusiaat tupaallaatigaa
Nakkutilliinermik ingerlatsivik suliat qanoq ingerlaneri paasiniarlugit qaammat ataaseq qaangiuppat killiffissiuisoqarnissaq pillugu Kommunimik isumaqatigiissuteqartoq nakkutilliinermik ingerlatsiviup pisortaa Helga Rask Jensen KNR-imut oqarpoq. Kommunilli sulianut ukkatarinnikkuni piffissarititaasup sivitsorneqarsinnaanissaa periarfissaajumaartoq taanna paasissutissiivoq.
