Pisortaq: Isumaginninninnermi nakkutilliisoqareerneratigut pitsanngorsaateqangaatsiarpoq
- 2018-imi apriilip allaartisimalernerani nutarterilluta aallartippugut, suleriaaserput tamaat allanngortiterparput.
Namminersorlutik Oqartussat nakkutilliisuisa nalunaarusiaanni isornartorsiuineq saqqummeqqammersoq akissuteqarfigalugu Kommuneqarfik Sermersuumi meeqqanut ilaqutariinnulli ingerlatsivimmi pisortaq taama oqarpoq.
AAMMA ATUARUK Pitsanngoriaateqarpoq – isumaginninnerulli iluani kukkuluttornerit suli amerlapput
Nakkutilliisut kommunip isumaginnittoqarfianut 2016-imi 2017-imi nakkutilliiartornerata kingunerisaanik kommunip ‘isumaginninninnermik sumiginnaaneranik’ naqissusiinerup malitsigisaanik nalunaarusiaq suliarineqarpoq.
Nalunaarusiami nutaami ingerlatsivimmi suliaqarnermi pitsanngortoqarsimasoq sulili aqqut takisoq inerniliunneqarpoq.
Nalunaarusiarli nutaaq Nuummi, Paamiuni Ittoqqortoormiinilu 2017-ip naanerani 2018-illu aallartinnerani isumaginnittoqarfinni nakkutilliinermut tunngavoq.
Qaammatialuimmi qaangiuttut, Kommuneqarfik Sermersuumi isumaginnittoqarfiit tamarmik 2018-imi apriilimi nutaamik nalunaarsueriaaseqalerput siunnersuisoqarneratalu siunnersuisarfiillu marluk misileraanerata kingorna suliamik isumaginninnermi ingerlatseriaaseq nutaarluinnaq pilersinneqarluni.
Martha Lund Olsenillu oqarnera naapertorlugu tamanna annertuumik pitsanngorsaateqarnermik kinguneqarpoq, tamannalu nalunaarusiami nutaami ilaatinneqanngilaq.
AAMMA ATUARUK Sermersooq inunnik isumaginninnermut 40 millioninik aningaasaleeqqittoq
- Assigiiaartumik suleriaaseqalerput massakkut sulisut. Suliaq nalunaarutigineqartoq takkuppat, suleriaasissaat imaappoq. Tamaavimmik tarmik allattoqqissaaqqapput Maleruagassaaraqarput tamarmik assigiimmik suleriaaseqassapput.
Nalunaarusiami nutaami isornartorsiuerujussuarnerit ilaat suliarpassuarni paasissutissat amigaataanerannut sulisullu paasissutissat sumiinnerannik ilisimasaqannginnerannut tunngavoq.
Nakkutilliisut aqagu aggeraluarunik qanoq ilusilerneqarnera allaanerussasoq, meeqqanut inuusuttunullu immikkoortortaqarfimmi pisortaq oqarpoq.
- Amerlasuut aaqqereersimassapput, aap.
Pisortaq: Allannguutit ullumi ataatsimi pilertanngillat
Nalunaarusiap kingulliup ilarujussuani Nuummi Paamiuni Ittoqqortoormiinilu isumaginnittoqarfiit oqaloqatigiilluartannginnerat aamma nassuiaatigineqarpoq. Tamannali aamma iliuuseqarfigineqareerpoq.
- Ilaat mississorpagut. Kisianni nalunngilara maani (Nuummi aaqq.) immikkoortortaqarfitta siulittaasuata Ittoqqortoormiinut Paamiunullu attaveqarnissamik akisussaasup oqarasuaatikku tataatsimeeqatigikulagai, Martha Lund Olsen oqarpoq.
Nakkutilliisulli pulaarnerisa kingornatigut politiit peqqinnissaqarfiullu suleqatiginerat pingaartumik nunatta kitaani aamma pitsanngorsarneqartoq, pisortap oqaatigaa.
Ilaqutariinnut sullissivinni suliniutinik pitsanngorsaanissaq aamma sumiginnarneqarsimasunut kinguaassiutitigullu kannguttaatsuliorfigineqarsimasnut neqerooruteqartalernissaq alloriarnissap tulleraa.
AAMMA ATUARUK Innarluutilinnut Danmarkimut inissinneqarsimasunut 491 millionit aningaasartuutigineqartut
Isumaginnittoqarfinnili sulinerup allanngortinnera aamma sivisusoq, Martha Lund Olsenip nassuerutigaa.
- Suli aaqqitassaqaaluppugut. Ulapippugut sapiissuseqarlutalu aamma susassaqarfik suliffigissallugu nuannaraarput. Atorfiit inuttalerneqartut amerliartuinnavipput tamanna ajunngilluinnarpoq.
