Nakkutilliisoqarfiup aalajangernera borgmesterip tupaallaatigaa
- Soorunami tupigusuutigaara, Kommunit nakkutilliisoqarfiata Kommuneqarfik Sermersuup Nuummi ininik 416-iusunik attartortitseqqiisarnera unitseqqummagu borgmesteri Charlotte Ludvigsen taama qisuariarpoq.
Kommuni inissiaatilinnut namminersortunut isumaqatigiissuteqarnermigut ininik Iserit A/S aqqutigalugu attartortitseqqiisarnera pineqarpoq.
AAMMA ATUARUK Kommuneqarfik Sermersooq nakkutilliisoqarfimmit isornartorsiungaatsiarneqarpoq
Kommunip inissianik namminersortunit attartornerminut aningaasartuutai attartortitseqqiinermi akiliutaasartunit amerlanerupput. Taamaaliorneq inatsisinik unioqqutitsinerusoq Kommunit nakkutilliisoqarfiata naqissuserpaa.
Nakkutilliisoqarfik pisuni pingasuni, tassalu inuussutissarsiornermi attartornermut isumaqatigiissutit aningaasaqarnermut ataatsimiititaliami akuersissuteqarnissaq pisariaqartoq qulakkeeqqaarnagu borgmesterip akuerisimagai, sakkortuumik isornartorsiorpaa.
- Annerusumik paasissutissanik aalajangiinermut tunngaviusimasunik amigaateqarpugut, taamaattumik aamma tusagassiutinut nalunaarutigineqartoq aallaavigalugu kisimi taakkua sianigisaqarfigaagut. Taamaattumik tunngavigineqarsimasut paaserusunnartorujussuupput, Charlotte Ludvigsen oqarpoq.
Suliat kinguneqartinneqarsimasut
Sulialli aningaasaqarnermut ataatsimiititaliamit kingusinnerusukkut suliarineqarlutik inatsisinut naapertuuttunngortinneqartut borgmesteri KNR-imut erseqqissaavoq .
Kisianni taama aaqqiineq kinguneqarsimasoq, taamaanneralu aningaasaqarnermut ataatsimiititaliap aamma iliuuseqarfigisariaqartarsimagaa, Charlotte Ludvigsen oqarpoq, qanorli pisoqarsimanera itisilersinnaannginnerarlugu.
Erseqqissaaqqusisoq
Nakkutilliisoqarfiup kommunip periusia isornartorsiorpagu suliaq eqqartuussivilersuunnissaanut piareeqqallutik Charlotte Ludvigsenip siusinnerusukkut oqaatiginikuuaa
AAMMA ATUARUK Borgmesteri inissianut atatillugu suliamut: Suliap massuma naammassinissaa sivitsortumik utaqqisimavarput
Qanorli pisoqarumaarnersoq suli aalajangerneqanngilaq:
- Massakkoqqissaaq soorunami nakkutilliinermut siunnersuisoqatigiit attavigissavagut nassuiaateqaqqullugit aalajangiinerminnut suut tunngavigisimaneraat, Charlotte Ludvigsen oqarpoq.
Pisoq inissiani pineqartuni 416-ini attartortuusunut toqqaannartumik kinguneqassanngitsoq Kommunit Nakkutilliisoqarfiata KNR-imut paasissutissiissutigeerpaa.
