Borgmesteri inissianut atatillugu suliamut: Suliap massuma naammassinissaa sivitsortumik utaqqisimavarput
- Suliap massuma naammassinissaa massakkut sivitsortumik utaqqisimavarput, taamaattumik neriulluartorujussuuvugut massakkut sammineqalermat, Kommuneqarfik Sermersuumi borgmesteri Charlotte Ludvigsen kommunip inissaqartitsiniarluni aaqqissuussineranut atatillugu taama oqarpoq.
Aaqqissuussineq taanna aqqutigalugu inissiat 416-it ukiut tallimat ingerlaneranni sanaartorneqarsinnaasimapput. Kommunimulli aningaasanik millionilikkaanik tamanna aamma akeqarsimavoq, tassungalu atatillugu inatsisinik unioqqutitsisoqarsimanersoq, Namminersorlutik Oqartussat Kommuninullu Nakkutilliisoqarfiup maanna misissuiffigisussaaanngorpaat.
AAMMA ATUARUK Inissianut atatillugu suliaq: Attartortup pisinnaatitaaffini ujariatsigigai
Charlotte Ludvigsenili nakkutilliisoqarfimmik marlunngorpat ataatsimiinnissaq sioqqullugu isumalluarpoq:
- Una periuseq taamanikkut aallartikkatsigu soorunalimi misissuititsinikuuvugut inatsisinik unioqqutitsinnginnersugut. Taamanikkullu takutimmagu taamaattoqanngitsoq sulineq aallartinnikuuarput. Massakkut una suliaq naammasseriarpat soorunami innuttaasutsinnut sullissinerput aammalu inissianik attartugassanik amigaateqangaaqisugut taanna assut neriuppunga sulinerput nangeqqissinnaassallutigu, Charlotte Ludvigsen taama oqarpoq.
Nuummi inissaaleqineq ajornartorsiutaavoq
Kommuneqarfik Sermersooq 2015-imili Nuummi inissaaleqineq iliuuseqarfiginiarlugu, aningaasaliisartunit namminersortunit inissianik attartortarnikuuvoq. Inissiat taakku kommunip inissiaatileqatigiiffia Iserit A/S aqqutigalugu attartorteqqinneqartarput.
Kommunilli sanaartortartunut namminersortunut akiliutigisartagai, inissiani najugallit akiliutaannit qaffasinnerupput. Taamaammat, init taakkua attartorneranni kommuni matussutissiisarluni.
Assersuutigalugu kommunip tassunga 2020-mi aningaasartuutai 11 millionit koruuniupput, ukioq manna 17 millionit koruunit, aappaagulu 27 millionit koruuniunissaat naatsorsuutigineqarluni.
Namminersorlutik Oqartussat nunamut namminermut immikkoortortaqarfiata 2020-mi februaarimi attartornissamut isumaqatigiissutit tamakkua naapertorlugit, amigartoornissat kommunimit qulakkeerneqartarneri unitseqquai.
Naalakkersuisut suliassaq Kommunit Nakkutilliisoqarfiannut siorna novembarimi taava ingerlateqqippaat, tassanilu tamanna atorneqarunnaartussanngortinneqarluni.
Atorunnaartussanngortitsineq suli atuuppoq.
AAMMA ATUARUK Kommunit Nakkutilliisoqarfiata Sermersooq inissianik attartortitseqqiisarunnaarallartikkaa
Piffissap ingerlanerani Namminersorlutik Oqartussat suliffeqarfimmik avataaneersumik misissuitinneqalerput, taakkuali kikkuuneri KNR-imut isertuunneqarput.
Paasissutissalli nutaat aallaavigalugit nakkutilliisoqarfik suliassamut atatillugu naapeqqittussanngorpoq.
Politikkikkut aalajangiinerusoq
Namminersorlutik Oqartussat kommunilu suliaq eqqartuussissuserisunut siusinnerusukkut misissuiffigitippaat. Inatsisit unioqqutinneqarsimanersut taakku isumaqatigiinngissutigaat.
Kommuni inissianik taakkuninnga sanaartortitsisussatut inatsisitigut pisussaaffeqanngilaq, sanaartortoqarnissaali politikkikkut aalajangiinerusoq kommunip oqaatigaa:
- Inissiat ineriartornermut malinnaatinneqarnikuunngillat, taamaattumik aamma kommunitsinni inissialiortiternissat sukataarluta misissorsimavagut, taamaasillutalu periuseq una ukiut tallimat ingerlaneranni nassaarinikuuarput, inissiat 416-it pilersissinnaasimallutigit. Ullumikkut inissarsiorlutik allattorsimafffimmi utaqqisuni takusinnaavarput innuttaasugut 2200-t sinnerlugit inissarsiortutut allattorsimasut, taamaattumik ajornartorsiut taanna eqqarsaatigalugu inissiat ukua pilersinneqarnissaat sukataarussimavarput, Kommuneqarfik Sermersuumi borgmesteri Charlotte Ludvigsen oqarpoq.
Kommuninut Nakkutilliisoqarfiup suliamut atatillugu aalajangigaa Kommuneqarfik Sermersuup suliaanut akerliussappat, suliap Eqqartuussisoqarfik Sermersuumut ingerlateqqinnissaanut piareeqqallutik borgmesterip oqaatigaa.
