Kommunit Nakkutilliisoqarfiata Sermersooq inissianik attartortitseqqiisarunnaarallartikkaa
- Kommuneqarfik Sermersooq inatsisinik maannamut unioqqutitsisimaneragaananilu eqqunngitsuliorsimaneragaanngilaq. Ilumulli taamaaliorsimanersoq misissorneqaleruttorluni.
Namminersorlutik Oqartussat Nunamut Namminermut Immikkoortortaqarfianni pisortaq, Klaus Georg Hansen, Kommuneqarfik Sermersuup inissianik attartortitseqqiisarnerata saqitsaassutaasoq pillugu taama oqarpoq.
Kommunit Nakkutilliisoqarfiatami Kommuneqarfik Sermersooq namminersortut inissiaataannik attartortitseqqiisarunnaarallartippaa. Nakkutilliisoqarfik novembarip ulluisa 19-ianni ataatsimiinnermi taama aalajangerpoq.
Kommunit Nakkutilliisoqarfiat pillugu paasissutissat
Suliamik Kommunit Nakkutilliisoqarfiannut ingerlatitseqqiinissamut naammattunik tunngavissaqarnersoq, Naalakkersuisut aalajangigassaraat.
Kommunit Nakkutilliisoqarfiata nunatsinni kommunalbestyrelsit nakkutigisarpai.
Tassani ilaasortat tallimaapput. Savalimmiuni Ombudsmandi, Sólja í Ólavstovu, siulittaasuuvoq.
Kommunit Nakkutilliisoqarfiata kommunalbestyrelsip, aningaasaqarnermut ataatsimiititaliap ataatsimiititalialluunniit allap suliamut attuumassutillip aalajangernera inatsisinik unioqqutitsiffiusimappat atorunnaarsissinnaavaa.
Kommunit Nakkutilliisoqarfiata kommunimi aalajangigaq suliaritillugu atorunnaarallarsissinnaavaa.
Kommuneqarfik Sermersoorlu namminersortut inissiaataannik innuttaasunut attartortitseqqiisarunnaarallartitaavoq.
Namminersorlutik Oqartussat Nunamut Namminermut Immikkoortortaqarfiat kommuninik nakkutiginnittuullunilu Kommunit Nakkutilliisoqarfiannut allattoqarfiuvoq.
Tusarfik: Aqutsinermut inatsit
Nunamut Namminermut Immikkoortortaqarfiup kommunip namminersortut Nuummi inissiiaataasa ilaannik attartortitseqqiisarnermigut inatsisinik ilumut naapertuineranik misissuileruttornerani taamaaliorpoq.
- Suliaq inissianik attartortitseqqiisarnermut tunngasoq qulaajarluaqqullugu allagaatinik tassunga tunngasunik maanna pissarsiniarpugut. Allagaatissarsiornerpullu nangissavarput, Klaus Georg Hansen oqarpoq.
- Suliarlu taanna pillugu allagaatit pisariaqartitavut tamaasa aatsaat pissarsiarereerutsigit, kommuni inatsisinik unioqqutitsisimaratarsimanersoq misissorsinnaanngussavarput, taanna ilanngullugu oqarpoq.
Aalajangerneq nutaanik suliniuteqarnissamut akimmititsisoq
Kommunili inatsisinik unioqqutitsisimanngitsoq, Kommuneqarfik Sermersuup borgmesteria Charlotte Ludvigsen oqarpoq. Kommunit Nakkutilliisoqarfiata kommuni inissianik attartortitseqqiisarunnaarallarnissaanik aalajangernera, taassuma uggoraa.
- Attartortitseqqiisarunnaarallartitsinerminik suli atuutsitsinera uggornarpoq, Charlotte Ludvigsen oqarpoq.
Tamannalu kommunip inissianik attartortitseqqiinermut suliniutaata ilaannut sunniuteqalereerpoq.
- Tamanna inissianik attartortitseqqiinermut suliniutitta ilaasa kinguaattoorujussuarnerannik kinguneqarpoq, tamatumunngalu aningaasaliiniartut sussaaginnarnissaat aarleqqutigaarput, borgmesteri oqarpoq.
Suliaq uani pineqartoq kommunip inissianik 2015-imili attartortitseqqiisalersimaneranut tunngavoq. Kommunimmi Nuummi inissaaleqineq iliuuseqarfiginiarlugu inissiarsuarnik 16-inik 416-inik inissiartalinnik attartortitseqqiineranik ilaqarpoq.
AAMMA ATUARUK Namminersorlutik Oqartussat Kommuneqarfik Sermersuullu inissianik attartortitseqqiisarneq saqitsaatigigaat
Nunamut Namminermut Immikkoortortaqarfiulli Kommuneqarfik Sermersooq inissianik attartortitseqqiisarnermik unitsitsissasoq februaarimi peqqussuteqarfigaa.
Nakkutilliisoqarfiup taamaaliorneq pisortat inatsisaanni malittarisassanik atuuttunik unioqqutitsinertut nalilermagu peqqussuteqarpoq. Tamanna kommunimut februaarip ulluisa aqqaneq-aappaanni peqqussummi allaqqavoq.
Initaarnissamut utaqqisut amerlaqisut
Inuit kommunip Nuummi inissiaatileqatigiiffianit Iseritsimit initaarnissamut utaqqisut maanna 1913-iupput. Kommunillu Nuummi inissiaatileqatigiiffianit initaarnissamut agguaqatigiisillugu ukiuni aqqanilinni utaqqisoqartarpoq. Suliaq naammassilertorneqanngippat innuttaasut initaanngitsoornerannik kinguneqaratarsinnaasoq, Charlotte Ludvigsenip aarleqqutigaa.
- Initaarnissamummi utaqqineq sivisunerulerataannaavoq, Charlotte Ludvigsen oqarpoq.
Kommuni suliaq pillugu allagaatinik, Nunamut Namminermut Immikkoortortaqarfiup noqqaassutaanik, tunniussissasoq, Kommunit Nakkutilliisoqarfiat aamma aalajangerpoq.
Nunamut Namminermut Immikkoortortaqarfiullu allagaatit suliamik qulaajaanissaminut pisariaqartissorisani kommunimut Kommunit Nakkutilliisoqarfiata aalajangernera naapertorlugu noqqaassutigereersimagai, Klaus Georg Hansen oqarpoq.
AAMMA ATUARUK Ineqarnermut suliaq Nakkutilliisunut suliassanngortinneqarpasilersoq
Allagaatit kommunimi politikkikkut aalajangikkanut tunngasut ilaatigut pineqarput. Nunamut Namminermut Immikkoortortaqarfianili nakkutilliisut kommunip politikkikkut aalajangiinernit allagaatai pissarsiareriaannaajuaannarai, borgmesteri oqarpoq. Allagaatit tamanut ammasut matoqqasullu tassani pivai.
Kommunillu allagaatiginngisaminik tamatuma saniatigut noqqaavigineqartartoq, borgmesteri oqarpoq.
- Allagaatiginngisatsinnik tunniussinissarput ajornakusoortuusoq akissuteqarfigeerpavut, Charlotte Ludvigsen oqarpoq.
