Naggueqativut uuliasiorneq pillugu saqitsaassuteqarnermi ajugaasut

Uuliasiortoqarsinnaaneranik misissuisartut MKI, nunamik ilaatigut sajuppillatsitsinerminni paasissutissaatitik uuliasiortitseqatigiiffissuarnut tuniniartarpaat, Kangertugaapiullu eqqaani misissuinissartik pillugu akuersissummik piniarsimallutik.

Nunaqarfik Kangertugaapik Davis Strædemut umiarsualiveqarpoq, Uummannatullu avannarpasitsigisumiilluni. Tamaani innuttaasut piniartarput, arferit, puisit, qilalukkat aarrillu piniarneqartarlutik.

MKI nunamik sajuppillatsitsigaangami nipiliortarpoq, soorlu aamma immami misissuigaangami nipiliortartoq, Kangertugaapimmilu innuttaasut tamanna aarlerinartoqartippaat, uumassusillit tamaanngaanniit qimaatinneqartarnerannik malitseqarsinnaanissaa ernummatigineqarluni.

AAMMA ATUARUK Nunavummi nunaqarfik Canadami eqqartuussiviit qullersaannut suliassanngortitsisoq

MKI-p taamatut misissuisinnaanissani pillugu Canadami oqartussanut akuersissummik piniarsimavoq, ukiunut tulliuttunut tallimanut atuuttussamik qinnuteqarsimalluni.

Naak naggueqatigiit Inuit avatangiisinik illersuiniaqatigiiffimmik Greenpeacemik ajornartorsiuteqartarsimagaluarlutik, avatangiisinik illersuiniaqatigiiffiup Canadami oqartussanik eqqartuussisulersuussiniarnera Kangertugaapimmi innuttaasut tapersersorpaat. Greenpeacellu Kangertugaapimmi innuttaasunik ikiuiniarnera tamaani najugallit iluaqutigivaat.

- Kangertugaapimmi piniartunut borgmesteriusimasumullu Jerry Nataninemut ullumi qujassuteqarniarpugut, pisinnaatitaaffitik pillugit sukataaruteqarsimanertik, Issittumilu avatangiisit mianerineqarnissaannut sukataaruteqarsimanertik qujamasuuteqarfigerusullutigit, Greenpeace taama ilaatigut oqarpoq.

MKI-p nuna sajuppillatsittarlugu misissuisarnerata kingunerisinnaasai pillugit nunaqarfimmiut annerusumik tusarniaavigineqarsimannginnerat, eqqartuussisulersuussinermi ajugaassutigivaat.
Eqqartuussiviit qullersaata tamanna aalajangerpaa, Kangertugaapiullu eqqaani nunamik sajuppillatsitsilluni misissuisoqassanngilaq.