Nunavummi nunaqarfik Canadami eqqartuussiviit qullersaannut suliassanngortitsisoq
Nunavup Kalaallit Nunaatalu akornanni imartani qajannaqisuni uuliamik ujarlernermi immap naqqani sajuppillatsitsilluni misissuinerit ingerlanneqarneri akerleralugit inuiaat inuit ukiuni kingullerni marlunni inatsisitigut sorsuutiginnissimapput.
Eqqartuussiviit qullersaasut aatsaavissuaq Nunavumi nunap immikkoortortaqarfianeersunik suliassanik ingerlatsissapput.
Aamma atuaruk Canadami uuliasiortut unitsinneqartut
Taama aalajangerneq Greenpeacemi issittumi akisussaasumit Jon Burgwaldimit nuannaarutigineqarpoq:
- Canadami eqqartuussiviit qullersaasa aalajangernerat immikkuullarillunilu imaannanngitsuuvoq. Eqqartuussiviummi suliassatut tunniunneqartut akornanni suliassat procentit tallimat qulillu akornanniittut kisiisa suliassanngortinneqarnissaat akuersissutigisarpaat. Imartani uumassuseqarnerup illersorneqarnissaanik inuiaat illersuisinnaatitaaneri, imaluunniit ingerlatsiviit uuliamik ujartuinerminni immap naqqani sajuppillatsitsillutik misissuinernik inangersimaneqassanersut suliakkiummi tunniunneqartumi qitiutinneqarpoq, Jon Burgwald ullaap tungaa oqarpoq.
Nutaarsiassaq nuannerluinnaqqissaartuuvoq, nutaarsiassarlu saqqummiunneqartoq peqatigalugu præsident Barack Obamap ministeriunerup Trudeaullu avammut nalunaaruteqarlutik ersarissarmassuk, USA-p Canada-llu avatangiisit kiisalu silap pissusaa pillugu iliuuseqarnissanik pingaartitsinerulernissat aalajangiussimallugit, tamatumani Issittup imartaani imartat eqqissisimatinneqartut illersugaasullu suli amerlanerit pilersinneqarnissaanni iliuuseqarfigineqarnissaannilu siuttuujumallutik.
